Atzo, eguenean, alerta goreneko eremu gorrian sartu zen Gorliz, COVID-19 positiboen intzidentzia 500etik gorakoa metatu ondoren; gaur, aldiz, maila bat behera egin du, 488,6ko intzidentzia-metatuagaz. Berango, ordea, haren ordezkoa hartu eta eremu gorrian bete-betean sartu da gaur, azkenengo orduetan 6 positibo atzeman eta 509,2ko intzidentzia-metatua gordeta. Hala, eskualdeko udalerri denak alerta gorenean daude gaur, Gorliz izan ezik, ozta-ozta. Eskualdeko datuei dagokienez, metatutako intzidentziak gora egin du, 735,45 puntugaz. Denera, 10.273 pertsona atzeman dituzte Uribe Kostan COVID-19agaz kutsatuta, martxotik gaur egunera arte, Osakidetzako datuen arabera.
Kontuak horrela, bihartik aurrera, Eusko Jaurlaritzako Osasun Sailak ezarritako hurrengo neurriak indarrean sartuko dira Berangon: ostalaritza-eta jatetxe-establezimenduak eta joko- eta apustu-establezimenduak itxi egingo dira; era berean, taldeko kirol-jarduera etengo da.
Horrez gainera, gogoratu beharra dago indarrean dauden murrizketei eutsi behar zaiela, hala nola etxeratze-agindua 22:00etatik 06:00etara, merkataritza- eta kultura-jarduerak bertan behera uzteko gehieneko ordutegia 21:00etan finkatuta dagoela, eta musika- eta ahots-entseguak eta emanaldiak bertan behera daudela, besteak beste.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun
