VIII. Itsas Martxa

"Aurrerapausoak izan diren arren, borrokan segituko dugu preso guztiak etxean eta aske izan arte"

VIII. Itsas Martxaren irudietako bat. © ITSAS MARTXA

Euskal preso eta iheslarien eskubideen alde zortzigarrenez itsasoratu ziren zapatuan Plentzian ehunaka lagun. Itsas Martxa hondartzetako ekimena bultzatzeko asmotan hasi zen, itsasadarrean gora senideak laguntzeko asmoz. Urte horietan guztietan, aurrerapausoak eta aldaketak egon dira presoen egoerari dagokionez, baina, oraindik orain, salbuespen politikakaz amaitzeko lanean jarraituko dutela iragarri dute antolatzaileek.

Eguraldiak lagun izan ez zuten arren, inoiz baino jende gehiago batu zen zapatuan itsasadarrean gora Itsas Martxan euskal preso eta iheslarien aldeko aldarriak ozen oihukatzeko. Zortzigarren ekimen euritsu horretan, 100 piragua inguru, 25 ontzi eta uretan ibiltzeko bestelako zenbait tramankulu bildu ziren Itsas Martxagaz bat egiteko.

Eguerdiko 12:30ak aldera, mobilizazioari ekin aurretik, Kepa del Hoyo euskal presoari eta bere senideei –Plentziara hurbildu ziren– omenaldia egin zieten. Izan ere, lau urte bete ziren zapatuan, uztailaren 31n, Del Hoyo Badagozeko kartzelan zegoela hil zenetik. "Galera gogor horrek erabat markatu zuen hortik egun batzuetara egingo genuen IV. Itsas Martxa", azaldu dute antolatzaileek.

2017ko urte horretan, espetxean hil zen 34. euskal presoa izan zen Del Hoyo, baina, harez geroztik, beste bi lagun hil dira. Hori dela eta, "zerrenda beltz" horretako lagun guztiak ere gogoan izan zituzten ekimenean, baita kartzelara bidean errepidean hildako 16 senide eta lagunak, "dispertsioaren ondorio zuzena".

Omenaldi horren ondoren, ohi bezala, zutabe bitan banatuta, itsasadarretik eta pasealekutik, euskal preso eta iheslari guztien eskubideen eta askatasunaren aldeko oihuak ozen aireratu zituzten Plentzian.

Erlazionatuak

Euskal preso eta iheslarien aldeko VIII. Itsas Martxa egingo dute zapatuan Plentzian

Plentzia

Azken urtean euskal presoak hurbilduko dituztela adierazi duten arren, horien egoera salatzeko eta elkartasuna adierazteko mobilizazioek jarraitzen...

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun