Marea Horia

"Eskubide guztiak, pertsona guztientzako, edonon"

Zapatuan, hainbat herritarrek parte hartu zuten Gorliz eta Plentzian egin zen V. Marea Horian. Ongi Etorri Errefuxiatuak plataformak antolatu zuen ekimenak helburu bikoitza izan du aurten: batetik, mundu osoan milioika pertsonek bizi duten errealitate gogorra agerian jartzea, eta, bestetik, gobernuei eta erakundeei exijitzea nazioarteko itunetan jasotakoa errespetatu dezaten.

Beste urte batez, Gorliz, Lemoiz eta Plentziako Ongi Etorri Errefuxiatuak plataformako kideek V. Marea Horia antolatu zuten zapatuan, abuztuaren 21ean. Egun eguzkitsuak lagunduta, dozenaka lagunek egin zuten ibilbidea Astondokotik Plentziako Ontziola plazara arte. Horiekaz batera, itsasotik ere hainbat piraguek ere hartu zuten parte ekimenean. 

Ibilbidean zehar, hainbat aldarrikapen oihukatu zituzten; besteak beste, exijitu zuten Kanariar Uharteetara, Ceutara eta Melillara iristen diren pertsonen legez kanpoko itzulketak bertan behera uztea eta Atzerritarren Barneratze-zentroak (CIES) behin betiko ixtea. Horretaz gain, erregularizazio-neurriak ere eskatu zituzten, pertsona etorkinek beraien egoera legalizatu ahal dezaten.

Ontziola plazan egin zuten ekitaldian, "Euskadi solidarioa" aldarrikatu zuten, "beraien jatorrizko herrialdeak utzi eta Europara iritsi nahian arriskuz eta zailtasunez beteriko bide bati ekin behar diotenekin". Gainera, COVID-19aren pandemiak etorkinen egoera larriagotu duela ere deitoratu zuten, eta, horren aurrean, Europan Batasunari eta gobernuei exijitu zieten "erantzukizunak bere gain hartzeko", eta asilo-eskatzaileei harrera egiteko.

Ekitaldia amaitzeko, itsasoan desagertutako pertsonei omenaldia egin zieten, Agurra dantzatuz eta lore eskaintza eginez.

Erlazionatuak

Errefuxiatuen aldeko Marea Horia egingo dute zapatuan Gorlizen eta Plentzian

Gorliz Plentzia

Ongi Etorri Errefuxiatuak plataformak antolatutako ekimenak helburu bikoitza dauka aurten: alde batetik, mundu osoan milioika pertsonek bizi duten ...

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun