Bizikletak konpontzeko sei puntu berri jarri ditu Aldundiak Uribe Kostan

Uribe Kostan bizikletak konpontzeko puntu berriak aurkeztu dituzte Berangon.

BiziPuntuak izeneko gune horietan bizikletetan konponketa txikiak eta mantenua egiteko tresneria jarri dute. Mugikortasun jasangarria sustatzeko politiken barruan kokatzen den egitasmoko totem hauek Berago, Erandio, Getxo, Gorliz, Sopela eta Urdulizen jarri dituzte, hain zuzen ere. 

Bizkaiko Foru Aldundiko Garraioak eta Mugikortasun Jasangarria Sustatzeko Sailak sei BiziPuntu berri aurkeztu ditu Uribe Kostan. Totem itxurako gune horietan bizikleten mantentze- eta konponketa-lan txikiak egin ahalko dituzte erabiltzaileek. Hauek dira zehazki eskualdeko BiziPuntu berrien kokalekuak:

  • Getxo: Errekagane kalean, kiroldegiaren sarreran.
  • Sopela: Loroño kalean, hondartzara doan zubiaren azpian.
  • Gorliz: Andra Mari kalean.
  • Erandio: BI-711 itsasadarreko errepidean, Jose Luis Goioaga etorbideko 31 zenbakian.
  • Urduliz: Aita Gotzon kalean, frontoiaren parean.
  • Berango: Sabino Arana kalean, Eroski aurrean.

"Funtsezko baliabidea da Bizkaian bultzatu gura dugun mugikortasun iraunkorreko eredua sustatzeko, bizikleta eta beste garraiobide jasangarri batzuk erdigunean kokatzen dituelako", azaldu du Miguel Ángel Gómez Viar Garraio eta Mugikortasun Iraunkorreko diputatuak agerraldian.

Gainera, Berangoko BiziPuntuan egin duten aurkezpenean egon dira Urdulizko, Berangoko eta Gorlizko alkateak: Javier Bilbao, Anabel Landa eta Nagore Utxupi, hurrenez hurren. Horiekaz batera, Javier Garcia Cafes Baque txirrindularitza taldeko presidentea ere egon da.

QR kodeagaz

BiziPuntu berriok Aldundiak orain arte lurralde osoan jarri dituenen ezaugarri berdinak dituzte: pneumatiko-estalkiak muntatu eta desmuntatzeko bihurkinak, giltza ingelesak, giltza finkoak, allen giltzak eta lanabesak ipini dituzte. Guneak gurpilak puzteko mahuka eta balbula bidezko konektoreakaz ere hornitu dituzte, puzteko eskuzko sistema bategaz eta airearen presioa kontrolatzeko manometroagaz. Gainera, ura dosifikatzen duen mahuka baten bidez garbitzeko aukera ere jarri dute. Lan horiek guztiak erosotasunez egin ahal izateko, bizikleta eusteko besoak dituen zutoinak ere jarri dituzte. Zutoinek 20 x 20 zentimetroko neurriak dituzte, eta 1,40 metroko altuera.

Bizikleta-guneko zutoinak Bizkaia markagaz eta kasuan-kasuko Udalaren logotipoagaz identifikatuta daude. Gainera, QR kode batek gunearen funtzionamendua ezagutzeko aukera ematen du, eta beste QR kode batek Bizkaiko Foru Aldundiak bizikletei buruz eskura duen informazioa eskaintzen du.

Erlazionatuak

Aldundiak bizikletak konpontzeko doako guneak ipiniko ditu

Getxo

Bizikletetan konponketa txikiak eta mantenu-lanak egiteko sei gune instalatu ditu Garraioak eta Mugikortasun Jasangarria Sustatzeko Sailak, Bizkaik...
Irakurle agurgarria:

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda. Horretarako, jarri gugaz harremanetan administrazioa@hiruka.eus helbidera mezu bat idatziz edo beheko botoiari sakatuz.


Izan zaitez HIRUKAlagun