Pertsona guztien erroldatzea bermatuko duen protokoloa eskatu du aurten Marea Horiak

Erredakzioa 2023ko abu. 19a, 15:38
Deskargatu Info Ahotsak :

Marea Horiaren mobilizazioa, gaur. Argazkia: Ongi Etorri Errefuxiatuak.

Ongi Etorri Errefuxiatuak plataformak urteroko Marea Horia izeneko mobilizazioa egin du gaur, zapatuan, Plentzia eta Gorlizko hondartzetan. Horietan bildutako lagunek salatu dute mundu osoko milioika pertsonak, euren jatorrizko herrialdeak utzi eta Europara iritsi nahian, “arriskuz eta zailtasunez betetako bide korapilatsua" hasi behar dutela. Gainera, migrazio- eta harrera-politika egokiak hartzeko eskatu diete gobernuei eta erakundeei, "nazioarteko itunetan jasotako giza eskubideak errespeta ditzaten".

Plentzia eta Gorlizko hondartzak bandera eta ikur horiz beteta ikusi ahal izan dira gaur eguerdian. Izan ere, Ongi Etorri Errefuxiatuak taldeak deituta, “Erroldarik gabe, izaterik ez” lemaren pean, Marea Horia mobilizazioa egin dute udalerriotan. Eguerdiko 12:00etan elkartu dira Gorlizko Hondartzapeko arrapalan, eta, bertatik, hareatzara jaitsi dira. Bertan, zapiakaz eta pankartakaz kate bat egin dute, eta halaxe jarraitu dute Arkoteko arrapalaraino. Portua inguratuta, Plentziako Ontziola plazara joan dira eta, bertan, omenaldia egin diete desagertutako pertsona migratzaileei; ondoren, loreak bota dituzte itsasadarrera.

Ekintzaileek gogoratu dutenez, 2023ko edizio honetan, gurera etorri diren pertsona migratzaileentzat oso garrantzitsua den arazo baten berri eman gura izan du Ongi Etorri Errefuxiatuak elkarteak: udal-erroldatzea. Azpimarratu dute udal-errolda ez dela paper bat bakarrik, “eskubide asko eskuratzeko sarrera-atea da”. Izan ere, erroldarik gabe, azaldu dute oso zaila dela osasun-txartela edukitzea erreferentziazko anbulatorioan edo adingabeen oinarrizko hezkuntzan sartzeko, baita Lanbideren ikastaroetara edo oinarrizko gizarte-prestazioetara sartzeko ere, zehaztu dutenez.

Are gehiago, deitoratu dute udal-erroldarik gabe ezinezkoa dela irregulartasun administratiboaren egoerari amaiera ematen dion egoitza lortzeko epeari hasiera ematea: “Pertsona askorentzat oso zaila da hori lortzea, baita ezinezkoa ere”.

Taldeko kideen arabera, Bizkaian, egoera irregularrean bizi diren pertsona gehienak ezin dira inon erroldatu, Administrazioak ez dituelako haien egoera zehatzak kontuan hartzen, baina "auzo eta herrietan bizi dira, eta udalek erroldatzeko betebeharra dute". Hori dela eta, udal guztiei eta Euskadiko Udalen Elkarteari (Eudel) eskatu diete protokolo bat abian jar dezatela udalerrian bizi diren pertsona guztien erroldatzea bermatzeko, gaur egun indarrean dauden baldintzengatik erroldatzerik ez badute.

Politika Gorliz Plentzia
Erlazionatuak
Marea Horia Gorliz eta Plentziako hondartzetara bueltatuko da abuztuaren 19an
Marea Horia Gorliz eta Plentziako hondartzetara bueltatuko da abuztuaren 19an

Nahia Martinez Gondra 2023 abu 15 Gorliz   Plentzia

Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.

Egin zaitez HIRUKAlagun eta gozatu euskaraz!


Izan zaitez HIRUKAlagun