Aldizkari berriak UK FOTO izena izango du, elkarteak bezala. Elkarteko presidente Ander Moreno del Campok adierazi du proiektu berri honen ideia bazkide batek proposatu zuela: "SYMART izeneko argazki-aldizkari digital bateko kidea da. Hortik atera zen proiektuaren ernamuina, eta pixkanaka-pixkanaka bazkide gehiagok eman dute izena".
Hala, 30 bat orrialdeko aldizkari digital bat sortzea pentsatu dute. "Elebiduna izatea da egokiena, baina oraindino ez dugu euskarara itzultzeko laguntzarik aurkitu, horretan ari gara lanean. Lehen zenbakia abendua inguruan izango litzatekeenez, oraindino denbora daukagu", azaldu du Campok.
Aldizkariko edukiari dagokionez, asmoa da eskualdeko argazkilariei egindako elkarrizketak argitaratzea, baita tokiko merkataritza zabaltzeko artikuluak jorratzea ere. "Horrez gain, beste atal batzuk ere izango dira, hala nola argazkiak ateratzeko lekuen gomendioak edota argazkigintzako atal teknikoak. Era berean, elkarteak hilabete horietan egindako jarduerak azaltzen dituen beste atal bat ere egongo da", zehaztu du presidenteak.
Halaber, antolatzaileen asmoa da hiru hiletik behin ale bat argitaratzea, beraz, urtean 4 zenbaki atera gura dituzte.
