Ehunaka pertsona batu dira Uribe Kostan, herriz herri, ikastetxez ikastetxe eta lantokiz lantoki, Israelek Palestinan egiten ari den sarraskia salatzeko. Urriaren 7tik batutako datuen arabera, Armada israeldarrak 10.000 zibil inguru hil ditu, tartean 4.000 haur baino gehiago, eta gatazkak 24.000 zauritu eta 1,5 milioi desplazatu inguru utzi ditu.
"Nazioarteko komunitatea gerraren eskalada logika batean oinarritzen den bitartean, eta Israelek su-etenerako deiak gutxiesten dituen bitartean, gizarte zibiletik elkartasuna zabaltzen ari da mundu osoan", azpimarratu dute elkarretaratzeen deitzaileek.
Uribe Kostan, askotariko protestak egin dituzte. Erandion, berbarako, 90 pertsona batu ziren udaletxearen aurrean Gazaren kontrako sarraskia geldiaraztea eskatzeko; Leioan, Boulevardean, 40 pertsona elkartu ziren; Getxon, 200 lagun Algortako Telletxe plazan eta 40 Itzubaltzeta/Romoko Santa Eugenia plazan; Berangon, 70 lagun inguru elkartu ziren; Sopelan, 30; Urdulizen, 10; Plentzian, 65; Gorlizen, 50; eta Barrikan, 30. Lemoizen ere elkarretaratzea egiteko deialdia egin zuten.
Udalerrietako mobilizazioez gainera, ikastetxeetan eta EHUko campusean protestak egin zituzten, hala nola San Nikolas eta Betiko ikastoletan eta Aixerrota eta Getxo 1 BHI institutuetan.
