Bizkaiko kiroldegietako langileek pairatzen duten "prekarietatea" salatzeko greba deitu zuten ELA, LAB, UGT eta CCOO sindikatuek. Getxo, Sopela edo Leioako kiroldegietan lanuzte partzialak egin dituzte astelehenean eta martitzenean, eta ELAtik horien "oso balorazio positiboa" egin dute, "jarraipena zabala egin dela esan dezakegulako".
Mobilizazio horien bitartez, Bizkaiko kirolerako lokaletako eta zelaietako langileek lan-hitzarmena aldatzea eskatzen dute: 35 orduko lanaldia, soldatak KPIaren gainetik igotzea, eskolak eta ikastaroak prestatzeko orduak libratzea, ikasgeletako ikasle- eta erabiltzaile-ratioa murriztea, bataz beste 1.200 euroko soldatak eta 50 minutuko eskola-orduak 60 minutukoen gisa kontutan hartzea.
Sindikatuek azaldu dutenez, urriaren 21ean Cebek Bizkaiko Enpresarien Konfederazioagaz egin zuten azken bileratik ez da aurrerapausorik eman, eta ez dute aurreikusten negoziazio-mahaia berriz ere elkartzea. Deitoratu dute Cebekek ez duela "negoziatzeko borondaterik", nahiz eta sindikatuek gatazkari konponbidea bilatzeko konponbidea bilatzeko prest egon.
