"Esan genuen eta esaten jarraitzen dugu: jaietako gunea oraindik ez da emakumeentzako gune segurua. Ospatzeko eta gozatzeko garaia eta eremua izan arren, emakumeoi ukatu egiten zaigu hauek nahi dugun bezala bizitzeko eskubidea. Nazkatuta gaude erasoak jasateko mehatxupean bizitzeaz", adierazi zuten Itzubaltzetako Talde Feministako kideek jaietan izandako erasoak salatzeko zapatuan egindako elkarretaratzean.
Gaineratu zutenez, "eraso eta erasotzaile gehiegi daude kontu isolatuak balira bezala jokatzen jarraitzeko". Halaber, azpimarratu zuten emakumeen gorputzetan eta bizitzetan jasaten duten indarkeria "egiturazko arazoa" dela, sistema ziseteropatriarkalaren emaitza, hain zuzen.
Era berean, ebatzi zuten gizarte osoaren erantzukizuna dela erasoei amaiera ematea eta gizonei eskatu zieten beren erantzukizuna har dezatela errealitate hori aldatzeko: "Erasotzailerik ez badago, amaitu egiten dira erasoak".
