Irailaren 22an, Plentzia, Gorliz eta Barrikako kostaldean BizkaiaGara Eguna egin zuten. Horretan, 500 kilo zabor baino gehiago biltzea lortu zuten, 200 boluntario baino gehiagoren konpromisoari esker. Hondakin gehienak erabilera bakarreko plastikoak eta 4.000 zigarrokin izan ziren. “Material horiek mehatxu larria suposatzen dute itsasoko eta lurreko ekosistemarentzat, eta nagusiki hondartzetatik, itsaslabarretatik eta marearteko eremuetatik kendu zituzten”, azaldu du Leire Ortiz de Zarate BizkaiaGarako koordinatzaileak.
Garbiketaz gain, birziklapena eta jasangarritasunaz kontzientziatzeko xedeagaz tailerrak eta hezkuntza-jarduerak ere antolatu zituzten, Nakusarbe, Surfrider, Tantak Elkartea, Goazen Up, Mare Fondum-Oceanidas, Mater, Ola Sin Plastico eta Sare Berdeak erakundeek zuzenduta. Plentziako Itsas Estazioak ere parte hartu zuen, laborategi mugikor batean itsas espezieen laginak erakutsiz, eta Plentziako portuko Colillaton eta itsaspeko garbiketa izan ziren eguneko beste puntu nabarmenetako batzuk.
Ekitaldia Xabier Zubiaga sukaldariak prestatutako bazkari bategaz amaitu zen, non parte-hartzaileek jardunaldiari buruzko hausnarketak partekatu zituzten.
"Bigarren edizio honen balantzea oso positiboa izan da. Gizartea aktibatzearen eta ingurunea zaintzearen alde beren ekarpena egin nahi dutenentzako urteroko ezinbesteko hitzordu gisa finkatu dugu ekitaldia", adierazi zuen Ortiz de Zaratek.
