Gaur, urriak 2, arrastiko 18:00etan, Tantak elkarteak antolatutako mikroplastikoei buruzko tailer praktiko bat egingo dute, Urdulizko kultur etxean, ItsasMuseumeko Bilbaoko zientzialariek eta PIE Plentziako Itsas Estazioko ikerlariek emanda. Hala, interesa dutenek ikasiko dute mikroplastikoak non aurkitzen diren eta horrek planetari, osasunari eta egunerokotasunari nola eragiten dioten. Oraindino ere azken plaza batzuk gelditzen dira. Izen-ematea: iratxe@tantak.eu helbidean.
16 urtetik gorakoentzako tailerra izango da eta betiere ludoteka zerbitzua egongo da 3-12 urteko haurrentzako. Ekintza hau, Uribe Kostako Mankomunitateak sustatutako Mikroplastikoei UKo proiektuaren barnean kokatzen da.
Horrez gain, beste hainbat ekintza ere egingo dituzte asteon mikroplastikoen errealitatea ezagutzeko: barikuan, urriaren 4ean, antzerki bat egingo dute Urdulizko kultur etxean, 18:30ean, 4-12 urteko haurrentzat zuzenduta. Gainera, erakusketa ere egongo da ikusgai Urdulizen urriaren 6ra arte, eta urriaren 7an, Plentzian hasiko da.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
