Goizean, ikastetxeetan, eta arrastian, udalerrietan. Uribe Kosta osoan entzun zen atzo herri palestinarraren aldeko aldarria eta Gazako genozidioaren amaiera emateko eskaera. Izan ere, gogoratu zutenez, Israelek 43.000 palestinar baino gehiago hil ditu iazko urriaren 7an sarraskia abiatu zuenetik; gainera, salatu zuten Gazako azpiegituren % 70 suntsitu dituela haren armadak.
Mobilizazioei amaiera emateko, Gernika-Palestina herri ekimenak bere kolaboratzailea izandako Mahasen Al-Khatib gazte ilustratzailearen hilketa salatu zuten. Azaldu zutenez, Israelgo armadak Gaza iparraldean dagoen Jabalia herrian egin duen eraso batean hil zuten, beste dozenaka palestinarregaz batera.
Elkarretaratzeak, Uribe Kostan
Mobilizazio jendetsuak egin zituzten atzo eskualdeko udalerri guztietan: Plentzian, 100 pertsona inguru batu ziren; Gorlizen, 50; Erandion, 150; Urdulizen, 35; Barrikan, 30; Sopelan, 50; Leioan, 150; Berangon, 65; Itzubaltzeta/Romon, 110; Lemoizen, 16; eta Algortan, 300 inguru.
Argazkiak herrietako auzokideek HIRUKAri helarazitakoak dira.
