"Ez dugu pornografia emozionalik nahi. Komunikatu malenkoniatsu bat duen argazkirik ez dugu igoko, ezta lau urte iraungo duen agur-bira faltsu bat egingo ere. Gurea askoz errazagoa da: solemnitatetik urrun dagoen itxiera bat nahi dugu, institutuko lagunekin banda bat sortzeak ekarri duen dibertimentutik gertu dagoena", adierazi dute Guda Dantzako kideek, eta iragarri dute hilaren 18an, agurraren berri emateko bideo bat ere argitaratuko dutela.
Horregaz batera, azpimarratu dute guztiaren gainetik nerabezaroko ametsa betetzen ari diren bost lagun direla: "Musika talde bat aurrera eramatera". Hori dela eta, iragarri dute 2025 urtea "ospakizun-urtea" izango dela eta, beste sorpresa batzuen artean, aurreratu dute beraien azken kontzertua 2025eko ekainaren 21ean eskainiko dutela Bilboko Kafe Antzokian.
