Elkarretaratzean Mankomunitateko eta udalerri desberdinetako udaletako ordezkari politikoak, eta langileak izango dira, baita aldarrikapen horregaz bat egin gura duten Uribe Kostako bizilagunak ere. Ekintza hau Mankomunitateak eskualdean genero-berdintasuna eta emakumeen ahalduntzea sustatzeko programatutako jardueren barruan kokatzen da.
Emakundek duela gutxi nabarmendu du oso garrantzitsua dela feminismoa eta gizartean duen botere eraldatzailea ikusaraztea, batez ere genero-desberdintasuna ukatzen duten eta berdintasun-politikak mespretxatzen dituzten mundu mailako mugimendu ultraeskuindarren testuinguruan.
Uribe Kostako Mankomunitateak berdintasun erreal eta eraginkorrerantz aurrera egitearen garrantzia azpimarratzen du. Gainera, eskualdeko pertsona guztiak animatzen ditu Uribe Kostako udalek eta mugimendu feministek martxoaren 8a dela-eta aste-akabuan antolatutako ekitaldietan parte hartzera.