Nola baloratzen dituzue 6 urte hauek?
Oso balorazio positiboa egiten dugu. Uribe Kostako sexu-genero disidenteen asanbladak sei urte hauetan gure komunitatea indartu eta erreferente bihurtzea lortu du. LGTBIQ+-fobiari kolektiboki aurre egiteko mekanismoak antolatu ditugu, eta eskualdean eremu seguruak sortzeko lan egin dugu. Mobilizazioez gain, hitzaldiak, jardunaldiak eta ospakizun bereziak antolatu ditugu, gure identitate eta borrokak aldarrikatzeko. Hala ere, argi dugu bide luzea dugula oraindik aurretik, eta gure borrokak jarraitu behar du.
Taldea sortu zenutenetik gaur egun arte, zein erronka izan dituzue?
Pandemia globalak herri mugimendua ahuldu zuen, eta eskuin muturraren gorakadak gure eskubideak mehatxatzen dituzten diskurtsoak normalizatu ditu. Hala ere, guzti horietatik indartuta irten gara. Hasieran, gure helburua argia zen: Uribe Kostan Transmaribibollo borrokarako eremu bat sortzea, hiri handietara joan behar izan gabe. Saretu, artikulatu eta gure borroka ikusgarri egitea bilatzen genuen, jai-giro hutsean geratu gabe, herri-mugimenduaren parte aktibo izatea eta gure agenda propioa ezartzea. Helburu horiek lortu ditugula esan genezake.
Etengabeko eraldaketan egon gara, gure izenean bertan islatzen den bezala. Hasieran Transmaribibollo Asanblada ginen, eta gaur egun sexu-genero disidentziaren asanblada gara. Eztabaidak eta hausnarketak etengabeak izan dira, eta egoera berrietara egokitzeko gaitasuna erakutsi dugu.
Non daude jarrita orain zuen indarrak?
Hiru ardatz nagusitan zentratzen dira: aliantzak garatzea, eremu seguruak sortzea eta aurrean ditugun mehatxuen aurrean irmoki kokatzea. Batetik, argi daukagu bakarrik ezin dugula borrokatu; horregatik, ezinbestekoa da bestelako borroka eta eragileekin aliantzak eraikitzea, eskuin muturraren eta faxismoaren gorakadari modu kolektiboan aurre egiteko. Bestetik, gure komunitatearentzat eremu seguru eta disidenteak garatzen jarraitu behar dugu. Eta, azkenik, ezin gara mututu; argi eta garbi posizionatu behar gara mehatxuen aurrean, transfobia estrukturala gaitzetsi egiten dugu. TERF-en diskurtso eta erasoen aurrean tinko erantzuten jarraituko dugu eta ez ditugu horrelako jarrerak onartuko.
Zer nolako egitaraua prestatu duzue apirilaren 12rako?
Apirilaren 12an, Danontzat Gaztetxean (Plentzia) gure VI. urteurrenaren jaialdia ospatuko dugu. Egitarau oparoa prestatu dugu; hitzaldi, ikuskizun eta festa-giroko ekintzak uztartuz. Garrantzia eman diogu, batetik, aliantzen eta borroka ezberdinen arteko loturak azpimarratzeari, eta, bestetik, gozatzeko, ospatzeko eta saretzeko eremuak sortzeari.
Eguna 12:00etan hasiko da "Aliantza kuir eta lodiak" mahai-inguruarekin, Mijo Lizarzaburu eta Magda Piñeiroren eskutik. Ondoren, 13:30ean, Marianitada izango dugu, elkar ezagutzeko espazioa. 15:00etan, herriko bazkaria egingo dugu (beganoa), bazkaltzera etorri nahi dutenek izena eman dezakete hemen.
Arratsaldean, musika eta dantza izango dira protagonista: 16:30ean, Pomada bandak poesia eta musikaz girotuko du bazkalostea, eta 17:30ean Vogue tailerra izango dugu, komunitate kuirraren historian hain garrantzitsua izan den dantza-estiloa ezagutzeko eta praktikatzeko. 19:00etan, Bafle poteo kuirra egingo dugu, kaleak harrotasunez betetzeko, eta 21:00etan, Ay Dragmela! ikuskizunaz gozatzeko aukera izango dugu. Gauean, 22:00etan, urteurreneko ekitaldi nagusia egingo dugu, eta ondoren festa giroa nagusituko da, 23:00etan Mikosis taldearen kontzertua, eta 00:00etatik aurrera Plazeratu kolektiboaren DJak izango ditugu dantzan jarraitzeko.
Jaialdira gerturatzera gonbidatzen zaituztegu!
Etorkizunerako asmo berezirik duzue?
Epe motzean, hurrengo hitzordua maiatzaren 17a izango da, Homofobia, Lesbofobia eta Transfobiaren aurkako Nazioarteko Eguna. Borroka-egun garrantzitsua da guretzat, eta mobilizazioak eta ekimenak antolatuko ditugu sistema zisheteropatriarkalaren indarkeria eta diskriminazioaren aurka.
Epe luzera, gure helburua argia da: sareak ehuntzen jarraitzea eta sistema bera errotik iraultzea. Ez gaude hemen tolerantzia eske, ez dugu onarpen apalik bilatzen. Ez gatoz sistema honen barruan tokia egitera, baizik eta sistema bera desegitera eta bestelako bizitza ereduak eraikitzera. Generoaren eta sexualitatearen normak hautsi, deseraiki eta birsortzea da gure borroka.
Egitaraua:
- 12:00 Mahai-ingurua: Aliantza kuir eta lodiak Mijo Lizarzaburu eta Magda Piñeyrogaz.
- 13:30 Marianitada.
- 15:00 Bazkaria (aukera beganoa egongo da).
- 16:30 Pomada banda.
- 17:30 Vogue tailerra.
- 19:00 Bafle poteo kuirra.
- 21:00 Ay Dragmela.
- 22:00 Ekitaldia.
- 22:30 Mikosis.
- 00:00 DJa: Plazaratu kolektiboa.
Bazkaria: 10 euro.
Kontzertuak: 5 euro.
Guztia: 13 euro.