Atzo, maiatzak 21, Bizkaiko Batzar Nagusietan egindako osoko bilkuran, Iker Casanova EH Bilduko bozeramaileak Israeleko enpresakaz edozein harreman instituzional gaitzetsi zuen. “Erantzukizun moralarekin eta koherentzia etikoarekin jokatzeko unea da”, adierazi zuen, eta Palestinako herriaren aurkako indarkeriaren aurrean jarrera argia eta aktiboa hartzeko eskatu zien euskal erakundeei: “Gure seme-alabek eta bilobek galdetuko digute zer egin genuen genozidioa gertatzen zen bitartean”.
EH Bilduk Elkarrekin Bizkaiaren babesa ere jaso zuen, arrazoi etikoengatik I-SECekiko lotura hausteko beharra partekatu baitu. “Gazako genozidioaren aurrean mundua isiltzen bada, Bizkaia ez dadila isilen artean egon”, adierazi zuen ordezkariak.
Gaitzespenak gorabehera, EAJk eta PSE-EEk osatzen duten Foru Gobernuak proposamenaren aurka bozkatu zuen, argudiatuta legez kanpokoa izango litzatekeela lizitatutako kontratu bat deuseztatzea, kasu oso zehatzetan izan ezik. Ildo horretan jardutea prebarikazio delitua izan daitekeela ohartarazi zuten, bai eta administrazioarentzako arrisku ekonomiko eta legalak ere. Ildo berean, aurka bozkatu zuen PPk ere.
Aldi berean, EAJk eta PSEk EH Bilduren beste proposamen bat babestu dute, Bizkaiko Foru Aldundiari, Garraio Partzuergoari eta Eusko Jaurlaritzari eskatzeko Gazako indarkeriaren amaiera bultzatzeko nazioarteko foroetan eta nazioarteko zuzenbide humanitarioa betetzea defendatzeko.
