Mercedes Etxegarai Urrutia jarduneko alkateak, Itziar Unibaso Barrikako alkateari zuzendutako erantzun ofizialean, azaldu du udalerrian urte osoan 2.000 ibilgailu inguru egoten direla erroldatuta, eta 700 aparkaleku-plaza baino ez daudela. “Horrek baliabide erabilgarrien kudeaketa oso doitua egitera behartzen gaitu, erroldatutako herritarren sarbideari lehentasuna emanez”, adierazi du.
Hiribilduko Udalaren esanetan, zenbait zerbitzu publiko –hala nola ikastetxeak eta osasun-zentroak– Plentziako erdigunean kokatuta dauden eta Barrikako herritarrek ere erabiltzen dituzten arren, aparkalekuetarako sarbidea erroldatzean oinarritzen jarraitu beharra dago. Hala ere, gogoratu du neurriak hartuta daudela daborduko, besteak beste, Barrikako herritarrentzako sarbidea errazteko: ikastetxeetatik 350 metrora aparkaleku libreko eremu zabala dago; metro-geltokiaren ondoan txandakako aparkaleku bat dago, 9 ordura artekoa; eta osasun-zentroaren inguruetan, 2 orduko txandakako aparkalekuak daude.
Nolanahi ere, Plentziako arduradunak azaldu du plaza gehiago eta zerbitzu hobea eskaintzea gustatuko litzaiekeela, "baina materialki ezinezkoa zaigu, espazio eta alternatiba bideragarririk ez dugulako". Era berean, gogoratu du aparkaleku guztiak doakoak direla eta ez direla dirua biltzeko asmoz ezarri, baizik eta “espazio publikoaren erabilera modu ekitatiboan antolatzeko tresna bat”.
Hori guztiagatik, Plentziako Udalak eskertu egin dio Barrikako alkateari barrikoztarren kezka eta proposamena, eta adierazi du Barrikako eta Plentziako bizilagunen arteko bizikidetza eta zerbitzuetarako sarbidea hobetzeko lanean jarraitzeko.
