Frantzia eta Espainiako estatuen arteko interkonexio elektrikoaren lanek kezka piztu dute inguruko herritarren artean. Izan ere, Gatikako bizilagunek salatu dute zulaketa zuzenduen ondorioz bentonita eta lohiak iritsi direla Butroi ibaira, Europako babespean dagoen arro batera. Hala, kutsadura horrek eragina ere izango luke beste herri batzuetan, besteak beste, Lemoiz eta Marurin. Herritarrek URAri eta Foru Aldundiko Ingurumen sailari abisua eman diete zulaketa gelditzeko eskatzeko.
Bilbo Irratiko EgunON Magazine irratsaioan aipatu bezala, Gatikako Josu Gonzalez Barojak adierazi du zulaketa makinak “bentonita” erabiltzen dutela eta hori ibaira heltzen ikusi dutela. Hala, azpimarratu du Butroiko arroa Europako babespean dagoela espezie sentikorrak bizi direlako, eta nahiz eta bentonitan toxikorik ez izan, eragin negatiboak izan ditzakeela: "Plastilinaren moduan geratu da hondoko lurrean eta ekosistemari eragin dio". Halaber, deitoratu du zulaketako harrizko hondar eta lohiekin nahastuta, denborarekin kutsatzaile bihur daitekeela.
Egoeraren aurrean, URAri eta Foru Aldundiko Ingurumen sailari abisua eman diete eta zulaketak gelditzea eskatu dute, trazatuaren alternatibak aztertzeko.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
