Hamasek eta Israelgo Gobernuak su-eten akordioa sinatu arren, oraindino Israel presionatzen jarraitzearen garrantzia azpimarratu dute sindikatuek, eta lanuzteak bere horretan mantendu dituzte gaurko egunerako, "Palestinan genozidioa, okupazioa eta kolonizazioa behin betiko bertan behera uzteko eta herri palestinarrak askatasunean bizitzeko duen eskubidea bermatzeko".
Lanuztearen erreferentziazko ordutegia 11:00etatik 14:00etara izango da, eta 15:00ak arte luzatuko da ordu horretan amaitzen diren jardunaldietan. Gaueko txandan, lanuztea 03:00etatik 06:00etara egingo da, eta arrastikoan, 19:00etatik 22:00etara.
Enpresa bakoitzeko ordezkaritza sindikalak lanuzteagaz bat egiteko eskatu die langileei, eta hamaika mobilizazio antolatu dituzte enpresetan goizean zehar. Eguerdian, manifestazio orokorrak egingo dituzte euskal hiriburuetan; Bilbon, berbarako, 12:30ean abiatuko da mobilizazioa, Jesusen Bihotzetik.
Arrastian, berriz, herriz herriko manifestazioak egingo dituzte Uribe Kostan, 19:30ean, Gernika-Palestina herri-ekimenak deituta.
