Zer gerta zitekeen argi ez zegoen udalerrietako bat zen Barrika. EAJ eta EH Bildu taldeak berdinketa teknikoagaz ailegatu ziren zapatura, udalen osaketaren egunera, bakoitza launa zinegotzigaz. Hala, iBarrika talde independenteko zinegotzi bakarrak, Jose Mari Elorriagak, zuen giltza, bere botoak erabaki zezakeelako nork jasoko zuen aginte-makila. Azkenean, bere burua bozkatzea erabaki zuen, zerrenda bozkatuenaren alkategaiari agintea emanez, hau da, EAJko Itziar Unibasori.
EAJko lau zinegotziek Itziar Unibaso hautagaia bozkatu zuten; EH Bildukoek Xabier Errementeria euren hautagaia, eta iBarrikako Jose Mari Elorriagak bere burua bozkatu zuen. Hartara, EAJ zerrendarik bozkatuena zenez, Itziar Unibaso bilakatu da Barrikako alkate datozen lau urteetarako. Roberto Muñozen lekukoa jaso zuen, Udalbatzaren zuzendaritzan zortzi urtez egon ostean.
Zapatuko osoko bilkuran,IBarrikako hautagaiak zerrenda bozkatuena errespetatzeko hitza bete du. Horretarako, EH Bilduren eskaintza errefusatu du, "udal gobernuan sartzea" proposatzen ziena, "jeltzaleen nagusitasunarekin amaitzeko eta herriarekiko komunikazioa errazteko". Oraingoz, airean dago independentea udal-gobernuko kide izango den ala ez.
Unibaso Kultura, Berdintasuna eta Ongizate zinegotzia izan da Udalean 2019tik, eta, orain, bere lehentasunen artean udalerriko auzoen arteko konexioak hobetzea dagoela iragarri du.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun
