Politika  Berango 2016-01-14 20:12

Saioa Sanchez Frantziaratu dute

Saioa Sanchez Iturregi Berangoko preso politikoa Frantziar Estatura eroan eta gehiago urrundu dute, Etxerat euskal preso eta iheslari politikoen senideen eta lagunen elkarteak gaur baieztatu duenez. Iturri berberek ziurtatu dute Sanchezen lekualdaketa daborduko amaitu dela eta Roanneko kartzelan (Auvergne-Rhone-Alpes eskualdean) dagoela, Berangotik 840 kilometrotara. Aurretik Estremeran (Madril) egon da hilabeteetan, 475 kilometrotara.

Saioa Sanchez Frantziaratu dute
Saioa Sanchez Madrilgo aireportuan. © ESPAINIAKO BARNE MINISTERIOA | Ikusi handiago | Argazki originala

Sanchez iazko martxoaren 5ean Espainaratu zuten, Auzitegi Nazionalak balizko terrorismo delituagatik epai zezan. Halere, epaiketa ez zen abiatu azaroaren 2ra arte. Bertan, Sanchezek INEM erakundearen Bilboko bulego bat 2006an leherrarazi izana ukatu zuen, argituz bera Frantzian zegoela orduan. Aurretik bera salatu zuten Iñigo Zapirain eta Beatriz Etxebarria euskal herritarrek azaldu zutenez, Guardia Zibilaren torturengatik esan zuten Sanchezek parte hartu zuela. Epaiketa bigarren egunean bertan behera utzi behar izan zuten, grabazio eta soinu sistemek hamaika arazo eragin zutelako, 27 milioi euroz zaharberritutako eraikin berrian.

Saioa Sanchez Iturregi 2007ko abenduaren 5ean atxilotu zuten Chateauneuf de Randon herrian (Lozere, Frantzia), Asier Bengoa gasteiztarragaz batera, ETAko kideak zirelakoan. 2013ko apirilean, preso berangoztarrari 28 urteko kartzela-zigorra ezarri zion Parisko Justizia Auzitegiak. Epe horretatik Sanchezek gutxienez zigorraren bi herenak, 18 urte eta zortzi hilabete, espetxean bete beharko ditu, epaiaren arabera. Mikel Carrera Sarobegaz batera, 2007ko abenduaren 1ean Capbretonen Raul Centeno eta Fernando Trapero guardia zibilak hil zituela frogatutzat jo zuten epaileek.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa