Jendartea  Berango 2018-11-09 12:06

Hainbat merkatarik planto egingo diote Sabino Arana kalearen inaugurazioari

Gaur, barikuan, inauguratuko dute ofizialki Berangoko Sabino Arana kalea. Gune hori berritzeko lanak abiatu zirenetik hainbat kontuz kexatu dira inguru horretako auzokide eta merkatari asko. Azken horiek gogoratu dutenez, oraindino ez dute "ezer ospatzerik"; hori dela eta, hainbat denda eta taberna itxita egongo dira inaugurazio ekitaldiak irauten duen bitartean, 18:00etatik 19:00etara, horri planto egin guran.

Hainbat merkatarik planto egingo diote Sabino Arana kalearen inaugurazioari
Dendetako batean jarri duten kartela plantoa iragartzeko. | Ikusi handiago | Argazki originala

Sabino Arana kalea berriztatzearen lehenengo fasea burutu dela goraipatzeko ekitaldia egingo dute gaur, barikuan. Arrastiko 18:00etan jarri dute hitzordua eta, horretan, "Otxandategi Dantza Taldea" izena eramango duen enparantza inauguratuko dute.

Dantza-talde horrek 75 urtez mantendu da indarrean, eta oraindino horretan dihardu. Hala, talde horren omenez euren izena eramango duen plaka jarriko dute leku horretan. Plazaren izendapena joan den ekainaren 26ko udalbatzan onartu zen, EAJ, PSE-EE, Denok Batera eta PP alderdien aldeko botoakaz. Udal-iturriek jakinarazi dutenez, EH Bilduk horren kontra bozkatu zuen eta adskribatu gabeko zinegotzia den Oscar García abstenitu egin zen.

Anabel Landa Berangoko alkateak dantza-talde horrek herrian duen garrantzia azpimarratu du: "Herriko kultur elkarteen artean 75 urteko ibilbidea duen lehenengo taldea da. Denbora horretan momentu zailen aurrean bizirautea lortu du. Gainera, egun Berangoren eta euskal kulturaren erakusleihoa bihurtu da". Landak auzokideak ekitaldira hurbiltzera gonbidatu ditu. Gainera, ekimen hori bultzatzen duten kale horretako tabernek pintxoak banatuko dituzte, doan.

Berriztatutako errepideari dagokionez, Landak azaldu duenaren arabera, "kale hau 25 urte baino gehiago egon da berriztapen honen zain. Duela hamarkada ugari diseinatu zen eta irisgarritasun gabezia handiak aurkezten zituen, egindako lanekin kendu ahal izan ditugunak". Alkateak onartu duenez, "herriko kalerik degradatuena zen, nahiz eta erdigunea izan", eta bere poza aurkeztu du "azkenean" proiektua aurrera eraman ahal izan delako.

Arazo logistikoak

Kalea berrizteko lanen lehenengo fasea amaitu berri dute. Eremu horretan jende asko bizi da, eta horrek beharrak egiteko orduan arazo logistiko "garrantzitsuak" eragin ditu. Zati horretako lanak egiteko 1,2 milioi euro inbertitu ditu Udalak, Mimenagako biribilguneko udalerriko sarreratik Metro Bilbaoren geltokiraino dagoen tartean. "Oinezkoek lehentasuna izateko diseinatu da. Helburua da giroa sortzea eta kaleari bizia emateko esparru handiagoak izatea", azaldu du alkateak. Herriko saltokietan erosketak bultzatzeko asmoagaz ere, aparkatzeko epe mugatua duten txandakako aparkalekuak sortu dira inguru horretan.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa