Politika  Berango 2019-05-22 08:28

"Eraikuntza-eredua aldatu eta etxebizitzaren arazoa konpondu" gura du EH Bilduk

Unai Brea

Herriarentzat bestelako hirigintza-eredu bat sustatu gura du Berangoko EH Bilduk, "herritarren parte-hartzean oinarritutako HAPO batetik abiatuta". Eraikuntza "masiboa" gelditu eta etxebizitza libreen ordez alokairu sozialari lehentasuna ematea dira koalizioaren programako helburu nagusietako batzuk. Horrez gain, Sabino Arana kalea berriztearen ondorioz sortutako "elementu arriskutsuak" berraztertu gura dituzte.

"Eraikuntza-eredua aldatu eta etxebizitzaren arazoa konpondu" gura du EH Bilduk
Etxebizitza libreen ordez babestutako etxebizitzak eta alokairu soziala bultzatzea du helburu EH Bilduk. CC BY SA-ZARATEMAN | Ikusi handiago | Argazki originala

Gazteen emantzipazioa sustatu gura du EH Bilduk, eta horregatik, etxebizitza sozialaren eraikuntza bultzatzeaz gain, alokairurako diru-laguntzak sortzea dago euren programako lehentasunen artean. Bestalde, herriko zenbait gune babestu gura dituzte, bertan eraikitzea galaraziz: eraikin historikoak, inguru naturalak, landa-eremuak... Bidegorri-sarea handitzea eta Sabino Aranan oinezkoen segurtasuna bermatzeko azterketa egitea dira beste proposamena batzuk.

Kulturaren eta kirolaren arloetan, berriz, azpiegitura berriak sustatzearen alde agertu dira EH Bilduren hautagaitzako kideak. Karabiganeko kiroldegia "adabaki" hustzat jo dute, eta ez dute uste Berangok behar duen "instalazio duina" hori denik. Bertako artistentzat gune bat ere sortu gura dute, eta auzoetan kultur jarduerak antolatu.

Izan ere, Sabino Arana ez beste auzoei arreta handiagoa eskaini beharra dagoela pentsatzen du koalizioak. Hala, Axganen pertsona nagusientzat eguneko erreta-zentro bat egiteko proposamena daukate. Herriko merkataritza txikia bultzatzeko zenbait neurri ere jaso dituzte euren hauteskunde-programan.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa