EAJk jakinarazi duenez, maiatzaren 26ko udal-hauteskundeetara aurkeztuko den taldea udalerriko auzokideak diren gizonak eta emakumeak osatzen dute, "gure udalerria sakon ezagutzen daben pertsonak, baita bere gabeziak eta indarguneak ere", azaldu dute jeltzaleek.
Euren hauteskunde-programan azaldu dutenez, herritarren parte-hartzea da euren lehentasuna, baita gazteentzako babestutako etxebizitza parke handi bat sortzea ere. Azken helburu horri aurre egiteko, hirigintza-lanak abiatuko dute Etxebarrin eta Arana-Karabiazpin, besteak beste.
Joan den urtean Sabino Arana kalea berriztu ondoren, beste eremu batzuetan berrikuntzak egingo dituztela iragarri du talde jeltzaleak, Kurtzen eta Lantzarten.
Ekintzailetza eta berrikuntza proiektuak bultzatzeko asmoz, Smart Lab bat ezarri gura du EAJk Berangon, baita ikasteko ikasgela gehiago ere. Era berean, ekonomia-jardueran, enpresa berriak zabaltzea eta bertako ekonomia indartuko duten establezimenduak suspertuko dutela iragarri dute.
Herritarren segurtasunari ere garrantzia eman diete jeltzaleek. Hala, datorren agintaldirako beste 3 udaltzain gehiago kontratatzea aurreikusi dute.
Hirigintzari dagokionez, berdegune gehiago ezarri, umeentzako jolasgune bat estali eta aparkatzeko leku gehiago egitea proposatu dute. Era berean, udalerriko baserriak mantentzeko eta zaintzeko katalogoa egitea planteatu dute, baita Burdin Hesiaren Oroimen Museoa mantendu eta hobetu ere.
