Alconza enpresako 38 langileren kaleratzearen aurka greba mugagabea hasiko dute hilaren 28an Berangoko lantegiko beharginek. Guztira, 250 langile dituen enpresa Iriziar Taldearena da, 2013an bereganatu zuenetik. Azken urteetan langileek hainbat protesta egin dituzte; azaldu dutenez, urteak daramatzate lanpostu eta lan-baldintza duinak bermatuko dituen bideragarritasun plan bat erreklamatzen, “baina Irizar Taldearen proposamen bakarra lanpostuen suntsiketa da, berrekite plan baten aitzakiagaz”. Beharginek deitoratu dute erabaki horregaz Alconzaren bideragarritasuna langileen lepora egin gura dutela.
Irizar Taldeak 2013an erosi zuen Alconza enpresa berangoztarra, enpresa-taldeari balio erantsi bat emateko asmoagaz; izan ere, erosketa egin zenean, lantegiak 250 langile zituen eta, mozkinak lortzeaz gain, erreferente bat zen merkatuan. Hala ere, beharginek salatu dute ordutik egin duten kudeaketa negargarriak oraingo egoerara eraman duela Alconza: “Ordutik ez dute inolako inbertsiorik egin eta ez diote balio erantsirik eman Berangoko lantegiari. Irizar Taldearen industria-planak norabide bakarrekoak izan dira; etengabeko lan-baldintzen prekarizazioa”.
Gaineratu dute Alconza erosi zuenean, kutxan zeuden 10 milioi euroak mozkinetan banatu zituela Irizarrek, eta, “azken zortzi urteetan Irizar ez da arduratu erosi zuen enpresaz, ez baitute lan-kargarik ekarri”.
Kaleratzeen eta egoera horren aurrean, langileek borrokatzeko prest azaldu dira, eta otsailaren 28tik aurrera greba mugagabea bati ekingo diotela iragarri dute. Adierazi dute ez dutela lana suntsituko dituen plan industrialik onartuko, eta gaur egungo eta etorkizuneko enplegua eta eskualdearen etorkizuna bermatuko duen egitasmoa bakarrik onartuko dutela. “Gure lanpostuen eta etorkizun duin baten defentsan guztiok elkarregaz borrokatzea da daukagun aukera bakarra”, adierazi dute.
