Greba mugagabea hasi zutenetik 40 egun pasa dira gaur, eta, beharginek azpimarratu dutenez, ez dituzte onartuko Alconza-Irizar enpresak astelehenean egikaritutako 25 kaleratzeak. Are gehiago, iragarri dute borrokan jarraituko dutela, "Bizkaiko metalaren greban egin zuten bezala", Berangoko lantegiaren enpleguaren eta etorkizunaren alde.
Gaur, apirilaren 8an, prentsaurrekoa eman dute grebalariek lantegiaren aurrean, eta borrokan jarraitzeko apustu irmoa egin dute: "Ez ditugu onartuko lankideen kaleratzeak. Ez ditugu 25 kaleratzeak onartuko, eta, horregatik, ez dugu eskuoihala botako. Borrokan jarraituko dugu!".
40 egun igaro dira Alconzako makinak itzali eta greba mugagabeari ekin ziotenetik. Euren helburua da kaleratzeko arriskuan dauden 38 beharginen lanpostuak defendatzea, eta baita Berangoko fabrikaren etorkizuna defendatzea, behin eta berriro azpimarratu dutenez.
Hala, besteak beste, manifestazioa egingo dute gaur arrastian, 19:00etan, Berangoko metro geltokitik abiatuta.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun
