Alconzako langileak borrokan

Kaleratutako 25 beharginak euren lanpostuetara itzultzeko eta Alconzaren etorkizuna bermatzeko borrokan jarraituko dute grebalariek

Berangoko Alconza lantegia martxan jartzea bermatzeko operatiboan, protestan zeuden grebalarietako bi atxiki ditu Ertzaintzak gaur goizean; horietako bati desordena publikoak eragitea eta lesioak egotzi dizkiote. Horrek, Aritz Azkonak, LAB sindikatuko Industria arloko arduradunak, salatu du leporatu gura diotena gezurra dela, eta "langileen aldarrikapenak bertan behera uzteko" biolentzia erabili izana deitoratu du.

59 egun bete dira gaur, apirilaren 27an, Alconza fabrikako langileek greba mugagabea hasi zutenetik. Gaurkoan ere, Irizar Taldeak lantegia kudeatzeko kontratatutako Norgestion enpresak planta berangoztarra zabaldu du, eta, horretarako, greban ez dauden langileak baliatu ditu. Horren aurrean, grebalariek protesta egin dute eraikinaren sarreran, eta horietako bi atxiki eta identifikatu ditu Ertzaintzak.

Oraingoan, manifestariak lantegira hurbildu direnerako, Ertzaintzak sarrera zigilatuta zuen. "Goizeko 05:50ak alderako hemen zeuden, gure zain", azaldu du Urko Herrera enpresa-batzordeko bozeramaileak. Hala, 07:00etan, lekuan batutakoak zigilatutako gunera gerturatu eta, kaleratutako 25 beharginen itzulera aldarrikatzen duen pankarta eskuetan zutela, ertzainek inguratuta, greba-hausleen zain egon dira.

08:00ak aldera hurbildu dira lantegira sartzeko prest zeuden beharginak, poliziek eskoltatuta, eta askotariko oihuen artean hartu dituzte grebalariek. Une horretan, istilua jazo da manifestari eta ertzainen artean; ondorioz, protestan zeuden kideetako bi atxiki eta identifikatu dituzte. Horietako baten kontra bortizki oldartu zaie ertzainek, ahoan borra-kolpe eta lurrera bota dutela.

Aritz Azkona LAB sindikatuko eskumaldeko Industria arloko arduraduna izan da gaur ertzainen biolentzia pairatu duenetako bat, eta, azaldu duenez, desordena publikoak eragitea eta lesioak egotzi dizkiote. "Aldarrikapenen eta salaketen aurrean, begi-puntuan jarri naute; lurrera bota naute, kolpatu naute eta egunotan pasatutakoak baliatu nahi dituzte nire kontrako muntai bat aurrera eramateko", deitoratu du.

Horren aurrean, besteak beste, sindikatuko kideak azpimarratu du lantegi berangoztarraren arazoa ezin dela bortizkeriazko modu horretan konpondu, eta, arduradunak "Alconzaren etorkizunaren eta enpleguaren alde badaude", aurreikusitako 38 kaleratzeak bertan behera uztea eta plan-industrial "erreal" bat garatzeko lanean jar daitezela eskatu die Irizar Taldeari eta Eusko Jaurlaritzari.

Irizar Taldeko zuzendaritzak enplegu-erregulazioko espedientea (EEE) aurkeztu du Alconzak Berangon duen lantegirako, eta horrek langile-taldearen % 40a kaleratzea ekarriko luke, hau da, 38 pertsona. Horren aurrean, eta enpresak lantegi berangoztarra 2013an erosi zuenetik egindako "kudeaketa negargarria" salatzeko, beharginek makinak gelditu eta greba mugagabeari ekin zioten otsailaren 28an. Daborduko 25 langileren kaleratzeak exekutatu ditu enpresak.

Erlazionatuak

Ertzaintza sindikatuaren eta langileen kontrako tresna moduan ez erabiltzeko exijitu dio LAB sindikatuak Eusko Jaurlaritzari

Berango

LAB sindikatuko eskumaldeko Industria arduradun Aritz Azkona Dominguez jipoitu eta erretenitu du Ertzaintzak gaur goizean. Bere sindikatukoek gogor...
Grebalarien aldarrikapenak bertan behera uzteko biolentzia erabiltzen ari direla deitoratu dute

Berango

Berangoko Alconza lantegia martxan jartzea bermatzeko operatiboan, protestan zeuden grebalarietako bi atxiki ditu Ertzaintzak gaur goizean; horieta...
Bigarren egunez Alconza lantegiak ateak ireki dituen arren, grebalariek borrokan jarraituko dute

Berango

Ertzaintzaren dispositibo handi bati esker, ateak ireki ditu berriro ere gaur Berangoko Alconza lantegiak. Grebalariek piketea zuten deituta goizek...
Irakurle agurgarria:

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda. Horretarako, jarri gugaz harremanetan administrazioa@hiruka.eus helbidera mezu bat idatziz edo beheko botoiari sakatuz.


Izan zaitez HIRUKAlagun