Vox talde politikoak eta Villacisneros fundazioak ekitaldiaren harira aurkeztutako salaketengatik abitu du ikerketa Espainiako Auzitegi Nazionalak. Kasua daraman Ismael Moreno magistratuak daborduko hiru pertsona inputatu ditu ekitaldiaren antolaketan parte hartzeagatik, eta Berangoko frontoia erabiltzeko eskaera egin zuen Kandaru kultur elkartea ere aipatu due ikerketan. Era berea, auzitegiak Berangoko Udalari ekitaldiagaz lotutako informazioa eskatu dio, eta Ertzaintzari eta Espainiako Gobernuak EAEn duen ordezkaritzari ere argibideak eskatu dizkie.
Ekitaldiaren aurretik, martxoaren 11n, aipatutako alderdi politikoak, fundazioak eta Dignidad y Justicia elkarteak ekimena debekatzeko eskatu zioten Espainiako Audientzia Nazionalari, baina ez zuen beharrezkotzat hartu. Horren aurrean, Berangoko Udalak adierazpen instituzional bat kaleratu zuen esateko ez zuela ekitaldi politikorik baimendu udal-pilotalekuaren erregelamendu arautzaileak ez dituelako baimentzen halako erabilerak; zehaztu zuen Kandaru kultur elkarteari baimena eman ziola udal-pilotalekuan bertso-saio bat eta bazkaria egiteko. Gaineratu zuenez, juridikoki ez da onargarria eskaera bat ukatzea, "suposizio, uste edo hipotesi subjektiboetan oinarrituta, arbitrariotasunez jokatzen delako".
Bestalde, Euskal Preso Politikoen Kolektiboak EPPK jakinarazia zuen horrelako ekitaldiak era pribatu batean egingo zituztela Berangoko ongietorria egin zenerako. Horretaz gain, Sortuk ez zuen bat egin ekitaldiagaz.
Aginagak 18 urte eman zituen kartzelan, 2003an, Espainiako Poliziak ETAko "Nafarroa Komando"-ko kidea izatea egotzita atxilotu zuenetik. Aurretik, kale borrokari lotutako akusazioengatik ere atxilotu eta espetxeratu zuten; hala, guztira, 21 urte eman ditu preso. Hasiera batean, EPPK-ko kidea izan zen, baina duela zenbait urte utzi zuen kolektiboa.
