Udalerriko "espekulazio urbanistikoa" salatzeko manifestazioa deitu du zapatu honetarako, hilaren 17rako, Otxantegi Herri Lurra taldeak. Horretan, gainera, proiektua arriskuan dagoela ohartaraziko dute, Otxandategiko lurrak ekainaren 21a baino lehen husteko agindua eman baitu epaileak. Ekintzaileek azaldu dutenez, manifestazioa 19:00etan abiatuko da metro-geltokitik, eta udaletxearen aurrean amaituko da.
Berango Lurraren Defentsan taldeak gogoratu duenez, Otxantegikoek bi urte daramatzate Otxandategi dorretxeko lurrak lantzen, "eta elikadura burujabetzaren nahiz nekazaritza ekologikoaren aldeko apustua egiten". Azpimarratu dutenez, bertako lurrak okupatu izana ez da kasualitatea, "Udalak eta jabeek lur horiek pelotazo urbanistiko itzela gorpuzteko tokitzat hartu zituzten, eta, hori ekidin guran, kolektiboak gune hau berreskuratu egin zuen, nekazari-guneen etenik gabeko galerari aurre egiteko".
Deitoratu dutenez, egoera "kezkagarria da". Izan ere, diotenez, Berangoko HAPOak nekazari- eta natura-gune diren 40 hektarea urbanizatzeko asmoa du, "2.300 etxebizitza baino gehiago eraikitzeko". Halaber, salatu dute eraikitze-prozesu horrek ez duela inguruko etxebizitzen prezioak jaistea eragin; "aitzitik, espekulazioak alokairu eta etxebizitzen salneurriak ikaragarri garestitu ditu". Gauzak horrela, antolatzaileek etxebizitza eskubidea bermatzea aldarrikatzen dute, gehiago eraiki gabe eta dagoena zuzen banatuz, baita HAPOa berritzea ere. Horrez gain, haien arabera, "alokairu soziala bultzatu, etxebizitza hutsen zerrenda egin, eta herriko etxebizitzari dagozkion premiak aztertzea ezinbestekoa da".
