Espainiako Auzitegi Nazionalak Berangoko 16 auzipetu epaituko ditu ekainaren 8tik 26ra bitartean, Ibai Aginaga preso politikoaren ongi etorrian parte hartu izanagatik. Epaiketaren dataren berri jaso ostean, auzipetuek prentsaurrekoa egingo dutela iragarri dute: otsailaren 22an, domekan, 12:30ean, Berangoko Gudarien enparantzan.
Auzipetuek adierazi dutenez, agerraldi horretan egoeraren inguruko azalpenak emango dituzte eta "hurrengo pausuen nondik norakoak" zehaztuko dituzte.
Deialdian jasotakoaren arabera, akusazioak, besteak beste, 36 urte baino gehiagoko espetxe zigorra, 171 urteko inhabilitazioa eta 75.900 euro baino gehiagoko isuna eskatzen dizkiete. Prentsaurrekoa "Amnistia" aldarrikapenagaz lotu dute, "eskubide zibil eta politikoen defentsan".
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
