Ebazpenaren arabera, sustatzaileak eta enpresak lizentziaren baldintzak urratu dituzte, baimenak "berreraikuntza partziala" ahalbidetzen baitzuen eta 216 metro koadro eraisteko aukera jasotzen zuen; baina, Udalaren arabera, ez zuen inola ere errota suntsitzeko baimenik ematen, eta hori da, hain zuzen, gertatu dena.
Ebazpenean jasotzen denez, obrek ez dute bakarrik udal-lizentzia ez betetzea ekarri: Udalak gogorarazi du, halaber, Bizkaiko Foru Aldundiak ezarritako bete beharreko baldintzak ere baztertu egin direla. Aldundiak, nahiz eta eraikina Eusko Jaurlaritzaren Kultura Ondarearen erregistroan inskribatuta ez egon, bere txostenean adierazia zuen Goikoerrota "interes arkeologikoko ondasun" gisa katalogatuta zegoela eta obra orok helburu argia izan behar zuela: "Kontserbatu, berrerabili eta agerian uztea" eraikinaren balio kultural eta ondarezkoak; bereziki, errota bera.
Foru txosten horrek, gainera, proiektuaren balorazioan aldeko iritzia emana zuen, sustatzaileak aurkeztutako dokumentazioan "lehengo eraikina birgaitu eta handitzeko" asmoa azaldu zelako, eta zenbait elementu hidrauliko mantenduta errota "ulertu eta balioan jartzea" posible izango zelako. Aldundiak proposamen zehatzak ere egin zituen: esaterako, "irteerako arkua ikusgai" uztea, beiraztatutako azalera baten bidez, edo ur-biltegiaren esku-hartzea "minimoa" izatea, azpiegitura mekanikoko arrastorik agertuz gero tokian bertan kontserbatzeko.
Gertaerak ezinegona sortu du hainbat berangoztarren artean, eta EH Bilduk, bere aldetik, Udalaren jarduna "berandu" iritsi dela salatu du, eta irregulartasunak Fiskaltzara eramateko eskatu du, "ondarearen aurkako deliturik" egon daitekeelakoan. Udalak, momentuz, espediente teknikoaren bidea aktibatu du eta, eskatutako txostenen bidez, eraitsitakoaren benetako irismena eta eraikina "lehen bezala" itzul dadin egin beharreko proposamena argitzea du helburu.
