Tartanga “berdea” izan dadin, herri-ekimena sortu dute

Pasa den domekan, pertsonez osatutako mosaikoa egin zuten Tartanga Berdea ekimeneko kideek. © TARTANGA BERDEA

Kolektibo berri bat jaio da Erandio: Tartanga Berdea. Izan ere, bihar, eguena, egun garrantzitsua izango da Erandioko Tartanga inguruarentzat. Orduan amaituko delako Azpiegiturak foru-enpresak antolatutako lehiaketa publikoan eraikuntza-enpresek euren eskaintzak aurkezteko epea. Egin beharreko lanak dira Abaroa enpresak kaltetutako etxeak botatzea eta 113 etxebizitza eraikitzea, baita etxez aldatu behar izan zuten 66 sendiei behin betiko konponbidea ematea ere.

Trukean, Azpiegiturak sozietateak Erandioko Udalak emandako Tartangako lursail bat eskaini du; 20.000 metro koadroko gunea da, eta 400 etxebizitza eraikitzeko aukera dago. Udalbatzaren gehiengoak babestu du hirigintza-operazioa; ostera, auzokide denak ez daude ados. Hala, Tartanga Berdea herri-ekimena jaio da, “Altzagako gune berde eta publiko bakarra galtzeko zorian egoteak asko kezkatzen” duen askotariko kolektiboa da. Informazio-ekimenak abiatu dituzte.

Tartanga Berdearen oharra

Tartangako eremua enpresa eraikitzaile pribatu baten eskuetara helduko da. Tartanga berdea nahi dugu!

Erandioko herritarrak Altzagako kiroldegiaren alboko gunea galtzeko zorian gaude. Azpiegiturak enpresa publikoak, Udalak oparitutako lur-eremua enpresa eraikitzaile bati salduko dio.

Modu horretan, duela 11 urte Abaroako lardaskeriaren ondorioz kaltetutakoen 66 etxeak bota eta leku berean berreraikitzeko operazioa finantzatuko dutela diote.

Horrela publikatu dute ateratako pleguetan. Ekainaren 15ean eraikitzaileek euren proposamenak aurkezteko azken eguna izango da.

Kaleko igerilekua eta frontoia izango zena, eta azken hilabeteetan gozatzen ari garen gune berdearen ordez, 400 etxebizitza eraikitzeko asmoa dute!

Gaiaren inguruan dakiguna azaltzeko, galderak erantzuteko, dudak argitzeko eta egoeraren aurrean zer egin dezakegun pentsatzeko hainbat ekimen egingo ditugu kalean.

Erandioztarrok gaiaren inguruan jantzita egotea garrantzitsua dela uste dugu. Animatu nahi zaituztegu informatzera, galdetzera, eztabaidatzera eta parte hartzera. Gonbidatuta zaudete!

Erlazionatuak

Abaroak kaltetutakoen nekea amaitzear dago

Erandio

Udagoienean obrak hasiko dituzte, Abaroa enpresak 2007an egoera arriskutsuan utzi zituen etxeak bota eta 113 etxebizitza berri eraikitzeko.
Abaroak kaltetutakoek etxea izan dezaten 400 etxebizitza egingo dituzte Altzagan

Erandio

Pasa den otsailaren 25ean, Erandioko Udalbatzak behin betiko onartu zuen Tartanga-Kiroldegia eremuari dagokion Udal Planeamendu Arau Subsidiarioen ...

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun