Ekonomia  Erandio 2018-05-24 10:42

Cables y Alambresen "benetako apustua" ez egitea leporatu diote Vicinay taldeari

ELA eta LAB sindikatuek salatu dute Erandioko Cables y Alambres Especiales SA enpresako langileak aspalditik bizitzen dabiltzan "egoera larria". "Konpromiso sendoak" eskatu diote Vicinayri, "proiektu industrialaren aldeko benetako apustua egiteko, enpleguari eusteko eta segurtasun baldintza duinak lortzeko".

Cables y Alambresen "benetako apustua" ez egitea leporatu diote Vicinay taldeari
Joan den irailean behargin bat hil zen lan-istripuan Cables y Alambresen. CCBYSA HODEI TORRES - HIRUKA | Ikusi handiago | Argazki originala

ELA eta LABen oharra

Beharrezko ikusten ditugu konpromiso sendoak Erandioko Cables y Alambres Especiales enpresan Vicinay taldearen aldetik

Konpromisoak behar dira proiektu industrialaren aldeko benetako apustua egiteko, enpleguari eusteko eta segurtasun baldintza duinak lortzeko.

Erandioko Cables y Alambres Especiales SA enpresako langileak aspalditik bizitzen ari diren egoera larria salatzen dute LAB eta ELAk.

Inbertsio nahikoen faltak eragiten du langileek oso baldintza prekarioetan egin behar izatea euren lana, instalazioen eta makinen egoera negargarriak modu zuzenean eragiten baitie langileen osasun eta bizitzari. Aurten 25 lan-istripu izan dira, pasa den irailean lanean hil zen langilea ahaztu barik. Honi gehitu behar zaio iaztik hona etengabeko atzerapenekin ordaintzen dizkietela nominak.

2015eko martxoan erosi zuen Vicinay taldeak enpresa hau, eta erosketarekin batera 10 milioi eurotako inbertsioa iragarri zuten, 40 kontratazio berri eta produkzioaren %70eko igoera erosketa ondorengo 5 urteetarako.

Hala ere, orain arte egindako inbertsioa oso urruti dago aipatutako kopurutik eta edozein kasutan ez dator beharrizan urgenteenekin bat. ABLE bidez egiten dira kontratazioak eta nahi da produkzioa handitzea zaharkituta geratu diren makina batzuekin eta nahikoa ez den langile taldearekin. Zentzu honetan, langileen apustu tinkoa egiten dute proiektu industrialaren alde ahalegin itzelak eginez, segurtasun aldetiko baldintza txarrak gorabehera, inposatzen diete produkzio mailak lortzeko, eta honek ez die bermatzen ezta soldata sasoiz jasotzea ere.

Cables y Alambres Especiales SA erosteko operazioa Vicinay taldea, Bizkaiko Foru Aldundia eta enpresako akziodunen arteko akordio baten bidez egin zen.

LAB eta ELAk ulertzen dugu Eusko Jaurlaritza eta Aldundia ikusle hutsak bailiran ari direla jokatzen, euren erantzukizunarekiko utzikeriaz jokatuz. Ez da nahikoa akordioa sustatu eta argazkiak ateratzea, beharrezkoa da ondorengo jarraipena akordio hauek bete egiten direla bermatzeko.

Hau nahikoa izango ez balitz, Erandioko HAPOaren aurrerapenak zehazten du itsasadarraren ondoan ez dela enpresa egongo, bere lekuan etxebizitzen eremu bat proposatuz. Vicinay Taldeari konpromisorik exijitu gabe lur industriala urbano bezala birkalifikatzeko arriskuaren aurrean, enpresa-batzordea Erandioko udala eta gainontzeko udal taldeekin hitz egiten hasi da, eta bilera eskatu dio honezkero Vicinay Taldea eta Eusko Jaurlaritzari.

Egoera honetan, guztiz beharrezkoa da tartean dauden alde guztiekin akordio eta konpromiso sendoak lortzea, proiektu industrialaren aldeko benetako apustua lortzeko, 130 langileentzako enpleguari eusteko eta hauentzako laneko segurtasun baldintza duinak lortzeko.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa