Cables y Alambres enpresa bermatuko duen industria-plana eskatu dute langileek

Goizean egindako elkarretaratzea.

Cables y Alambres Especiales SAko langileek lan-baldintza duinen aldeko mobilizazioei ekin zieten joan den ekainean. Gaur, azaldu dute protestak gogortu dituztela eta bi ordutako lanuzteak egiten dabiltzala lantegiko hiru txandatan; deklarazioak Vicinay taldearen Bilboko egoitzaren aurrean egin dituzte, elkarretaratze zaratatsuan. Bertan, egoera zailaren eta industria-proiektu bat eskatzeko abiatu dituzten ekimenen berri eman dute.

Cables y Alambres SA enpresako beharginen oharra

CAESAko 130 langileren enplegua eta proiektu industriala arriskuan!

2015. urtean, Vicinay Taldeak Cables y Alambres SA (CAESA) erosi zuen. Operazio hartan, Eusko Jaurlaritzak eta Bizkaiko Foru Aldundiak parte hartu zuten. Taldeak 10 milioi eurotako inbertsioa egingo zuela agindu zuen, ekoizpena %70 handituko zuela eta 40 lanpostu berri sortuko zituela. Egun, ordutik hiru urte igaro direnean, aurrez aurre daukagun errealitatea hurrengoa da:

1.- Inbertsiorik ez eta lan-istripuak eguneroko ogia.

Instalazioa eta makineria egoera tamalgarrian, horrek lantokiaren ekoizpen gaitasunari zuzenean eragiteaz gain, langileen segurtasuna eta osasuna arrisku jartzen du etengabe.

Hain zuzen ere, ezin dugu ahaztu irailean jazo zen lan-istripua, langile baten heriotza ekarri zuena; ezta 2018. urtean jadanik Euskal Herrian jasan behar izan ditugun 27 lan-istripu hilgarriak ere. 27 hildako 6 hilabetetan. Datuok eskandalu bat dira eta guztion erantzukizuna eskatzen dute.

2.- Azaroaz geroztik nominen ordainketan etengabeko atzerapenak jazo dira.

Kobratu dugun azken nomina maiatzekoa da eta uztailean gaude. Enpresak eman digun informazioaren arabera, egoera honek ez du hobetzeko itxurarik, epe motz-ertainean behintzat.

3.- Erandioko Udalak proposatu duen Hiri Antolamenduko Plan Orokorraren Aurreratze Agiriak aurreikusten du lantegiak betetzen duen orubea birkalifikatuko dela, hiri-erabilera emanez.

Urrats bat emateko ordua iritsi da. Gure eskaria argia da, etorkizuna izango duen industria-proiektua, egungo enplegua bermatuko duena eta lan-baldintza duinak CAESAko langile guztiontzat.

Eskatzen duguna justua izateaz gain, langileontzako alternatiba bakarra da.

Hortaz, CAESAri eta Grupo Vicinayri nahiz Eusko Jaurlaritzari, Aldundiari, udal-taldeei eta Erandioko alkateari lan-proposamen bat egin diegu, guztion artean industria-plan bat hitzartu ahal izateko, hurrengo gaien inguruan:

  1. Egungo plantilla osoari enplegua bermatuko zaio.
  2. Industria-proiektuaren garapena eta bideragarritasuna ahalbidetuko duen adinako inbertsioa, langileon segurtasun- eta osasun-baldintzak bermatuko dituena.
  3. Orubea birkalifikatuko balitz, Erandioko Udalaren Hiri Antolamenduko Plan Orokorraren Aurreratze Agirian aurreikusten den bezala, Vicinayk konpromiso hartzea udalerri berean legokeen beste nonbaitera eramatera industria-proiektua eta langile guztion enplegua ziurtatzea.

Akordioa erdiesteko, eragile guztion inplikazioa behar dugu: Eusko Jaurlaritza, Aldundia, Udala eta alderdi politikoak. Horregatik, hurrengo eskari zehatzak erregistratu ditugu:

  • Eusko Jaurlaritzari: Grupo Vicinayk CAESA erosi zuenean, 2015eko martxoan, bere gain hartu zituen konpromisoak bete diren zorrozki aztertu eta gainbegiratu ditzala. Enpresa-proiektuaren iraunkortasuna bermatzeko asmoarekin.
  • Aldundiari: enpresak gaur egun bizi duen benetako egoerari buruzko analisia egin dezala, eta Sustapen eta Ekonomia Garapen Sailaren bidez landu dezala industria-plan berria, enpresa-proiektuaren egungo eta etorkizuneko iraunkortasuna ahalbidetuko duena.
  • Alkateari: zuzenean inplikatu dadila honetan, Eusko Jaurlaritzarekin, Aldundiarekin edota Vicinay taldearekin burutu nahi izango diren ekimenetan, nahiz udalean industria babesteko; eta hortaz, enplegua eta langileen lan baldintzak babestearren antola daitezkeen edozein aukeretan parte hartuz eta lagunduz.

Gaur CAESAko langileok borroka abiatu dugu, industria-proiektuaren defentsan, enpleguaren defentsan eta lan-baldintza duinen defentsan. Ez dugu etsiko gure eskubideak lortu arte!

Erlazionatuak

Lan-gatazkak Erandion: lan-baldintzak salatu dituzte Sanitas Loramendiko eta Cables y Alambreseko beharginek

Erandio

Datorren astean lan-baldintza duinen aldeko mobilizazioak egiten hasiko direla iragarri dute Erandioko Cables y Alambreseko langileek. Vicinay tran...
Cables Y Alambres enpresan ematen den LABen aurkako jazarpen sindikala salatu dugu

Erabiltzailearen aurpegia Uribe Kosta

Duela denbora batetik hona Cables y Alambres (Vicinay taldea) enpresako zuzendaritzak LABeko delegatuak jazartzeari ekin dio. Gaur LABek deituta 82...
Langile bat hil da Erandioko Cables y Alambres enpresan

Erandio Leioa

Behargin bat hil da gaur goizean Altzagako Cables y Alambres Especiales SA enpresan, atzo izandako lan-istripu baten ondorioz. Ezbeharra atzo, mart...