.jpg)
Zergak eta tasak murriztuko lituzke PPK Erandioko udal-gobernura ailegatuz gero. 2017an, 20.000 biztanletik gorako udaletako herritarrek baino %35 gehiago ordaindu zuten erandioztarrek (24.00 inguru ditu udalerriak), Susana de Cosek prentsa-ohar baten bidez salatu duenez. Bizkaiko batez bestekoa baino %34 gehiago.
"Bai legearen aldetik bai ekonomiarenetik, tartea dago zergak eta tasak gutxitzeko", esan du hautagai popularrak; "zelan liteke erandioztar gehienok dugunaren tankerako ibilgailu batengatik Madrilgoa baino zirkulazio-zerga garestiagoa ordaintzea?".
Batez beste, Ondasun Higiezinen Zerga (OHZ) Erandion %5,6 handiagoa da 20.000 biztanletik gorako Bizkaiko udalerrietan baino, Susana de Cosek nabarmendu duenez. Bide batez, etxebizitza hutsagatiko %50eko errekargua kentzearen alde egin du (Erandion onartuta dago neurri hori ezartzen duen ordenantza, oraindino martxan ipini ez den arren), eta bai zirkulazio-zerga bai OHZ jaisteko konpromisoa agertu du, alkate suertatuz gero. Arreta berezia emango lieke, iragarri duenez, familia ugariei, kideren batek menpekotasuna duen familiei, genero-indarkeriaren biktimei, langabezian luzaroan daudenei eta 52 urtetik gorako langabetuei.
