Politika  Erandio 2019-05-24 09:08

Udala "pertsonei hurbiltzeko" asmoa du EAJk Erandion

Erredakzioa

Hauteskundeak irabaztekotan herritarrekiko komunikazioa hobetu gura du Erandioko EAJk. "Erabaki publikoak hartzeko momentuan parte-hartzea ahalbidetuko dugu", diote jeltzaleek. Enplegua sustatzea, gizarte-larrialdiei erantzutea eta pertsona nagusien behatokia sortzea dira euren programan ageri diren beste asmoetako batzuk.

Udala "pertsonei hurbiltzeko" asmoa du EAJk Erandion
Erandioko EAJren zerrendako kideak. © EAJ | Ikusi handiago | Argazki originala

Azken zortzi urteetan alkate izandako Joseba Goikouria zerrendatik kanpo dagoela, Aitziber Oliban zinegotzi ohia da EAJren zerrendaburua domekako hauteskundeetarako. Astrabuduarrak zuzendutako taldearen lehentasunen artean daude herritarren parte-hartzea erraztea, enplegu-programak eta formazioa sustatzea eta merkataritzari bultzada ematea, Gizarte larrialdietarako laguntza-eskaera denei erantzuteaz gain. Trafikoa arautzeko Mugikortasun Plana ere iragarri dute, aparkaleku bila ematen den debora murrizteko ekintzak barne.

Programako lehen puntuan, hala ere, garbiketa, mantenu-lanak eta lorezaintza aipatzen ditu EAJk. Diotenez, "ahalegin berezia" egingo dute arlo horietan. Gainera, auzoetan argiteria hobetzeko, bideak asfaltatzeko eta oinarrizko zerbitzuetara joateko garraiobideak ipintzeko asmoa dute. Segurtasunaren eremuan, berriz, "erronka berriei" aurre egin eta Udaltzaingoa eguneratzeko konpromisoa agertu du hautagaitza jeltzaleak; "herritarrekiko hurbila" izan dadin apustua egiten dute, euren esanetan.

Udaleko eragileakaz adostutako osasun- eta kirol-planak ere baditu EAJk agendan. Kirol-azpiegiturak gaurkotzea izango litzateke helburuetako bat. Bestalde, kultur eskaintza gazte eta nerabeen proposamenakaz osotu gura dute, eta horretarako eztabaida-guneak sortu.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa