Kanpaina nagusirako, negozioek eurek aukeratuko dute zein zenbateko bonuak gura dituzten (10, 20 edo 50 euro) eta dirua hasieran emango die Udalak. Udalak azaldu duenez, oraingo honetan alarma-egoerak iraun zuen bitartean itxita zein zabalik egon ziren enpresei zuzenduko zaie laguntza. Irailaren 11ra arte egongo da zabalik izena emateko epea.
Beste kanpaina, berriz, udal-aldizkarian agertuko diren bonuen bidez gauzatuko da. Zehazki, argitalpen horretan bost euroko bonu bat egongo da, hogei eurotik beherako erosketak egiteko erabili ahal izango dena. Aldizkarian bertan adieraziko da zein saltokik egin duten kanpaina horregaz bat. Kasu horretan ordainketa ez da aldez aurretik egingo, baina merkatariek astez aste kobratu ahal izango dute bonuei dagokien dirua, Herritarren Arretarako Bulegoan. Esan bezala, 50.000 euro bideratuko dituzte kanpaina horretarako.
Udaberriko bonu-kanpinaren gainean onuradunentzako asebetetze-inkesta egin duela adierazi du Udalak, "eta halako ekimen batean berriro parte hartuko luketela adierazi dute denek". Lortutako kalifikazioa, batez beste, bederatzi ingurukoa da, azaldu dutenez.