Ehunka herritarrek babestu zuten otsailaren 20an Tartanga Berdeak Altzagan antolatu zuen mobilizazioa. Auzo horretako berdegunea babesteko beharra adierazi zuten, udal-gobernuak daukan 400 etxebizitza eraikitzeko proiektuaren aurrean; izan ere, deitoratu dute ez dutela inor topatzen "berdegune publiko batean etxebizitzak eraikitzeko onurak dituela defendatzeko gai denik".
Azaldu dutenez, "manifestazioak arrakasta izan bazuen ere, udal-gobernu taldeari zuzenean dei egin genion arren, ezer ez gertatu balitz bezala egiten jarraitzen dute, eta ez dira gai izan auzokideon gehiengoak sentitzen dugunari inolako erantzunik emateko".
Horren aurrean, beste aurrerapauso bat eman eta udal-ekimen bat Udalbatzara eramateko sinadura-bilketari ekingo diotela iragarri dute. Zehaztu dutenez, Erandion erroldatutako 18 urtetik gorako bizilagunen sinadurak bilduko dituzte eta, beraien helburua betetzeko, gutxienez erroldaren % 10 beharko dute, 3.000 sinadura inguru.
Ekintza horren bitartez 400 etxebizitza eraikitzeko proiektua geldiaraztea da beraien asmoa, "harik eta lursail horien etorkizuna erabakitzeko herri galdeketa bat egiten arte behitzat". Eraikuntza egiten hasten ez diren bitartean proiektua geldiarazteko aukera dagoela nabarmendu dute, nahiz eta etxebizitzak saltzeko eta zozketa publikoa egiteko prozesu-inmobiliarioa martxan dagoen.
Berdegunea babesteko arrazoien artean, azpimarratu dute daborduko Erandion hainbat etxebizitza-proiektu daudela, baina ez dutela herritarren bizi-kalitatea kontutan hartzen, ez baitago Tartangakoa bezalako irisgarritasuna duen berdegunerik auzoan: "Gaur egun Erandion buelta bat ematea gauzarik tristeena da, dena delako porlana eta ez dagoelako berdegunerik".
