Atzo, martxoaren 30ean, egin zuten aurkezpen ofizialean gogoratu zutenez, Ingelesezko All Iron adierazpen ezaguna oihukatzen zen Trianoko mendietan metal preziatuaren zain berrien agerpena ospatzeko. Gaineratu zutenez, esamoldeak kultur eta kirol-konnotazio nabarmenak ditu gaur Athletic Club futbol-taldearen garaipenakaz duen loturagatik, eta horregatik Ahaldun Nagusiagaz batera iragarpenean Jose Angel Iribar ere egon zen.
Rementeria eta Iribarregaz batera, Aitziber Olibanek, Erandioko alkateak; Amaia del Campok, Barakaldoko alkateak; Elixabete Etxanobek, Herri Administraziorako eta Erakunde Harremanetarako diputatuak eta Jon Ruigómezek, Athletic Clubeko presidenteordeak, hartu zeten parte atzoko ekitaldian.
"Zubi honek orduko industria handiaren eta EIC eta Bizkaia dorrea bezalako proiektuen errealitate berriaren arteko lotura ere sinbolizatzen du. Mugikortasun zaharretik mugikortasun berrira igarotzeko aukera ematen digulako. Mugikortasun jasangarriagoa eta osasungarriagoa. Bertan, zapatila eta bizikleta, trenarekin batera, gure ardatzak direlarik. Zubi honek Ezkerraldeko bidegorri-sare osoa, itsasadarreko etorkizuneko bulebarra eta Eskuinaldeko eta Bilboko sare osoa lotzen ditu. Itsasadar honetaz berriro gozatu ahal izateko" adierazi zuen Rementeriak.
Burdinaren legatua
1855 inguruan, lehenengo siderurgia-instalazioa eraiki zituzten Barakaldon, Fábrica de Hierros de Nuestra Señora del Carmen izenekoa, eta orain zubi mugikorra eraikiko den lursail berean eraiki zuten Trianoko meatze-arroko burdina-minerala urtzeko eta industrializazio-prozesuak eskatzen zituen ontzi-, tren- eta eraikuntza-jarduera ugarietan ustiatzeko. Lantegi hura Bizkaiko Labe Garaien enbrioia izan zen; ondoren Labe Garaietan integratu ziren, besteak beste, La Iberia fabrika, gaur egun Arcelor Mittal dago bertan, edo Altos Hornos de Bilbao bezalakoak.
Zubi mugikorraren ezaugarriak
Zubi mugikorraren metalezko egitura harkaitzezko ohantzean ainguratutako dute 12 pilaren gainean eta bi tarte finko eta bi tarte mugikor izango ditu. Baoek 27 metroko argia izango dute, erdiko baoan eta horren ondoko bietan izan ezik; erdiko baoak nabigazio-kanala mugatzen baitu eta 60,20 metroko luzeera izango du, eta horren ondoko biek 20 metroko tartea izango dute.
Bi zati mugikorrak erloju-orratzen norabidean irekiko dira; hala, Barakaldotik hurbilen dagoen tartean erdiko baoa ibaian gora orientatuta geratuko da, eta Erandiokoan, berriz, ibaian behera.
Zubiaren azpiko ubide nabigagarriak 50 metroko zabalera izango du eta itsasadarretik nabigatzen diren itsasontzi gehienak zubi itxiarekin igaroko dira, diseinuak taula azpian itsasgoran 6,5 metroko galibo librea gaitu duelako.
