Martxoaren 11n itsasadarrak gainezka egin zuen Altzagan, auzoko hainbat kaletako komertzio, garaje eta ostalaritza-establezimendutan kalteak eraginez. Bizilagunek, dendariek eta ostalariek koordinakunde bat osatu dute, eta nabarmendu dute 1983ko uholdeetatik, Altzagako hiriguneak bizi izan dituen uholderik larrienak izan direla. Halaber, salatu dute horiek Erandio eta Barakaldo lotzeko All Iron oinezkoentzako zubiaren lanen eraginez izan direla, moilako defentsak kendu omen dituztelako.
Jakinarazi dutenez, koordinakundeko kideak Erandioko alkateagaz bildu dira, baina deitoratu dute ez dutela konpromiso edo konponbiderik lortu. "Kexarik gabeko konpromisoak eta konponbideak gura ditugu, etengabeko arriskuaren aurrean segurtasunik eta babesik eza dagoelako eta hemen inork ez dituelako erantzukizunak bere gain hartzen", adierazi dute sare sozialen bitartez.
Altzagako moilaren egoera gaur-gaurkoz, All Iron zubia eraikitzeko lanen eraginez. © ERANDIOKO AUZOKIDEOK
Kritikatu egin dute Foru Aldundiko Azpiegitura eta Lurralde Garapen Sailak All Iron zubiaren eraikuntzari ingurumen-ebaluaziorik ez egiteko eta Erandion dauden arrisku-baldintzatzaileei ez erantzuteko hartutako erabakia "arduragabea eta, ziurrenik, irregularra" izan dela.
Gauzak horrela, exijitu dute berehalako neurriak hartzea eta inguru horretako segurtasuna leheneratzeko. Gainera, iragarri dute baloratzen ari direla neurri legalak hartzea, "erantzukizunak argitzeko". Zentzu horretan, Erandioko Udalaren eta Aldundiaren portaera salagarria izan daitekeela azpimarratu dute, honako argudio hauek baliatuz: batetik, "itsasadarreko uholdeen aurkako defentsak kendu dituztelako lanengatik", eta, bestetik, "Euskal Autonomia Erkidegoko Segurtasun Sailak martxoaren 8an, uholde larria gertatu baino bi egun lehenago, emandako muturreko alertak ez kudeatzeagatik".
