Presoen etxekoei espetxeetako bidaien kostua arintzeko diru-laguntzak berreskuratu zituen iaz Getxoko Udalak. EAEtik kanpo espetxeratuta daudenen sendiek laguntza horiek eskatu ahal izan zituzten. Gobernu-taldearen (EAJ eta PSE-EE) eta EH Bilduren arteko akordioaren ondorioa izan zen deialdi hori, eta horretarako, 40.000 euro bideratu zituzten.
Diru-laguntza horiek berreskuratu ziren egunean, Popularrek ohartarazi zuten ez zutela inolako kontakturik mantenduko alderdi jeltzaleagaz, horiek mantentzen ziren arte. "Diru-laguntza hau onartzeak Gobernu-taldea EH Bilduren eskaeren aurrean uzkurtzen dela baieztatzen du", salatu zuen PPk.
"Presoen senideei diru-laguntzak ematea gehiegizkoa da. Biktimekiko errespetu falta itzela da, errekonozimendua eta konponbidea urratzen duelako", adierazi zuen Iñaki Gamero bozeramaile popularrak.
Atzo jakinarazi zutenez, baina, Gobernu-taldea eta PP akordio batera heldu dira, eta horren ondorioz laguntza horiek bertan behera geldituko dira, momentuz.
