%2011.52.07.png)
Visesarekiko hitzarmena aurten izapidetuko da; horri esker, erregimen berezian alokatzeko 88 BOE (gizarte-laguntzakoak) eraikiko dira, eta erregimen orokorreko 48. Etxebizitzok, gutxienez, 25 urtean alokatu beharko dira eta honako hauei zuzenduko zaizkie: orain dela 3 urte edo gehiago udalerrian erroldatu ziren getxotarrei (bajarik eman ez badute), eta azken 10 urteotan behin baino gehiagotan erroldatu direnei, gutxienez orain dela 5 urte inskribatu baziren lehenengo aldiz. Lanaren behin-behineko parte-hartze portzentajeak % 60koak dira VISESA sozietateari dagokionez, % 26koak Getxoko Udalaren kasuan eta % 14koak Eusko Jaurlaritzaren aldetik (diru-laguntzen bitartez).
Atzo, eguaztenean, osoko bilkuran jazotako eztabaidari dagokionez, PP taldeak ziurtatu zuen etxebizitza sortzeko plangintza-garapen guztien alde bozkatuko duela, nahiz eta Hiri Antolamenduko Plan Orokorra (HAPO) eta berorren berrikusketa geldituta egon. GUK taldeak, ordea, proposamena errefusatu zuen "ingurumena eta haren arrisku-eremuak, hala nola uholdeak gertatu daitezkeen guneak, barne hartzen eta errespetatzen dituen hirigintza politikaren alde egiten dugulako". Bestalde, EH Bildu etxebizitza politika integral baten alde azaldu zen, eta adierazi zuen Udalari dagokiola hura sustatzea: "Neurri partzialak hartzen ari dira, baina oso motel ezartzen dituzte. Oraindik gaude HAPO berrikusteko zain".
Gobernu-taldeak (EAJ eta PSE-EE), berriz, nabarmendu zuen Eusko Jaurlaritzak zehazten dituela zein diren derrigorrez bete beharreko betekizunak uholdeak gertatu daitezkeen guneetan ez eraikitzeko, eta honako hau esan zuen: "Getxoko plangintzan eta hirigintza garapenean aurrera egiteko irtenbidea erabaki politikoa egitea da, baina hori hemen gauden talde politikoen nahiaren menpe dago".
