Politika  Getxo 2019-05-16 16:26

Arlo sozialari lehentasuna ematearen alde egin du GUK Getxok bere hautagaitzaren aurkezpenean

Unai Brea

GUK Getxok Itzubaltzeta/Romoko nagusien etxea aukeratu du maiatzaren 26ko udal-hauteskundeetarako hautagaiak aurkezteko. "Orain dela ia 40 urte eraikin hauen alde borroka egin zutenetako batzuk gure hautagaitzan daude gaur egun", azaldu du Kike Prada alkategaiak.

Arlo sozialari lehentasuna ematearen alde egin du GUK Getxok bere hautagaitzaren aurkezpenean
Adineko pertsonentzako arreta hobea aldarrikatu dute, besteak beste, GUKen aurkezpenean. © GUK GETXO | Ikusi handiago | Argazki originala

"Udalak bere lehentasunak aldatzea" eta arlo sozialari garrantzi handiagoa ematea da GUK Getxoren helburu nagusia, hautagaiek adierazi dutenez. Ildo horretan, nagusien etxea eraistearen guztiz aurka agertu dira. "Udaleko pertsona nagusien egoera aldatu beharra dago, ez baitute behar besteko arreta jasotzen", Kike Pradaren esanetan; "eta gauza bera esan daiteke gazteez eta etxebizitza lortzeko dauzkaten zailtasunez".

Udalerriko auzo denen hobekuntza lortzeko ahalegina egingo dutela iragarri du Pradak, politika inklusibo, ekologiko eta feministen bitartez. Bestalde, GUKeko kideek gogor kritikatu dute oraindino jardunean dagoen gobernu-taldea: "Onartezina dira bertako krisi etiko eta morala, hala nola ustelkeria eta klientelismoa"; salatu dute.

Gaur egun GUKek dituen lau zinegotzietatik Prada da zerrenda berrian dagoen bakarra. Beste bi, Paula Amieva eta Susana Andollo, Elkarrekin Podemosen hautagaitzan joango dira oraingoan.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa