Akuarioa ixtearen erabakia atzera bota dezala eskatu diote grebalariek Getxoko Udalari

Getxoko Udalak Getxoko akuarioa urtarrilaren 31n ixteko proposamena egin du, Bizkaiko Foru Aldundiak zerbitzu horren finantzaketa etetea erabaki ondoren. Zerbitzu hori etetearen ideia joan den eguazten gauean ohar baten bidez helarazi zien Gobernu-taldeak (EAJ eta PSE-EE) gainontzeko alderdiei; ondoren, prentsa-ohar baten bitartez egin zuten atzo publiko intentzio hori. Horren aurrean, hilabete bi greba mugagabean dauden Getxo akuarioko langileek deitoratu dute prentsaren bitartez izan dutela horren denaren berri. Salatu dutenez, greba hasi zutenetik Udalagaz biltzeko eskaera egin dute hainbatetan eta denbora luzez horren zain egon dira; orain, Javier Urkiaga ELAko langileen ordezkariak HIRUKAri iragarri dioenez, datorren eguaztenean, abenduaren 18an, bilduko dira Getxoko Ingurumen zinegotziagaz euren etorkizunaren nondik norakoen berri izateko.

Egoera horren aurrean, grebalariek eta ELA sindikatuak ondorioztatu dute Gobernu-taldeak "aspaldi erabakia hartuta" zuela eta azaroaren 28ko osoko bilkuran langileei informazioa "nahita eta kontzienteki ezkutatu" ziela. "Hori lotsagarria da. Onartezina da Getxoko Udala egiten ari dena. Ez da inoiz arduratu Disetecmar enpresaren kudeaketaz akuarioan; ez du jardun Akuarioko langileek bizi duten egoera konpontzeko, eta orain hura ixteko erabakia hartu du, langile-talde osoa kalean utziz, inolako eragozpenik eta justifikaziorik gabe", salatu dute.

Hala, akuarioa ixteko erabakia atzera bota dezala eskatu diote grebalariek Getxoko Udalari, zerbitzu publiko horregaz jarraitzeko, behar bezalako baldintzetan eta langile denak mantenduta. Udal-gobernuak, bere aldetik, adierazi du ez duela proposamen horren gaineko baloraziorik egingo horren inguruko eztabaida osoko bilkuran egin arte.

Hilabete biko borroka

Getxo Aquariumeko hainbat langilek joan den urriaren 14an abiatu zuten greba mugagabea, Udalaren ardurapean dagoen akuarioko kudeaketa daraman enpresa esleipendunak (Disetecmar) kaleratutako langile biak berriro kontratatzea (horietako bat ELA sindikatuko ordezkaria) eta lan-hitzarmena "dagokion moduan" ezar dezatela aldarrikatzeko. Egoera konpontzeko, lan-gatazka horretan esku-hartzea eta neurriak hartzeko eskatu diote hainbatetan Getxoko Udalari, baita eurakaz biltzeko eskaera egin ere.