Zelan daramazu konfinamendu egoera hau?
Ondo; nahiko lasai, egia esan. Normalean gure lanarekin beti topera gabiltza, beraz, deskantsatzeko eta egin gabe neuzkan gauza asko egiteko aprobetxatu dut. Dena dela, apur bat arduratuta nago antzerkiaren sektorearen etorkizunarekin.
Konfinamenduaren inguruko komedia bat jarri duzue martxan. Zelan definituko zenuke telesail hori?
Komedia bat da, familia baten gorabeherak islatzen dituena. Konfinamenduaren ondorioz protagonistek euren etxean ematen diren egoera ezberdinak kontatzen dituzte.
"Jendea gure pertsonaiekin identifikatuta sentitu delakoan gaude"
Joan den apirilaren 8an estreinatu zenuten; zelako harrera izan du horrek?
Harrera ona izan duela uste dugu. Une honetan denok gabiltza gauza berdinak bizitzen; hala, jendea gure pertsonaiekin identifikatuta sentitu delakoan gaude.
Mikel Losada eta zuk osatzen duzue bikote protagonista. Zaila izan zaizue egoera hori interpretatzea?
Ez, oso gustura ibili gara elkarrekin lan egiten. Oso ondo ezagutzen gara.
Konfinamendu egoeran bete-betean zaudetela grabatu duzue dena. Zelakoa izan da lan hori?
Egia esan beharra badaukat, zaila. Dena egiten dugu guk: makillajea, argiztapena, grabaketa... Hala ere, lantalde bikaina dugu eta oso gustura gabiltza.
Aktore lanak egiteaz gainera den-dena grabatu behar izatea ez zen erraza izango...
Bai, arraroa egin zaigu. Gure lana interpretatzea da eta, ondorioz, batzuetan apur bat galduta ibili gara grabaketak egiterakoan. Gainera, teknologiarekin nahiko baldarra naizela aitortu beharra daukat...
"Dena egiten dugu guk: makillajea, argiztapena, grabaketa... Hala ere, lantalde bikaina dugu eta oso gustura gabiltza"
Zenbat saio grabatu edo grabatuko dituzue?
Oraingoz bi grabatu ditugu, baina lau saio izango dira guztira.
Azkenaldian antzerki-munduan ibili zara… Arraroa egin zaizu telebistara salto egitea?
Arraroa baino ezberdina dela esango nuke. Ikasteko aukera bat dela iruditzen zait. Gainera, Mikelek urte asko eman ditu telebistarako kontuak egiten eta asko laguntzen dit horretan. Asko ikasten dut berarekin.
Datorren krisi ekonomikoaren harira, kultura munduak kolpe handia jasango du eta Eusko Jaurlaritzak iragarritako neurriek haserrea eragin dute askoren artean. Zer deritzozu horri?
Urduri gaude ez dakigulako zer gertatuko den gurekin. Ez gara babestuak sentitzen.
