Koronabirusa Uribe Kostan

Merkatari, ostalari eta zerbitzu profesionalak dituztenentzako 2.400 eurora arteko laguntzak emango ditu Getxoko Udalak

Autonomoentzako eta enpresentzako laguntzetara 1,5 milioi euro bideratuko ditu Getxoko Udalak, Covid-19ak eragindako egoeraren ondoren udalerrian establezimenduak berriro irekitzea bultzatzeko.

Alarma-egoera deklaratzeak ekarri du norberaren konturako langile eta enpresa askok beren establezimenduak itxi behar izatea osasun-segurtasuna bermatzeko. Udalerriko negozioak ixtearen ondorioz, pertsona eta enpresa txiki askok zailtasunak izango dituzte beren jarduerari berriro ekiteko, konfinamendu-aldia amaitzen denean; izan ere, etenaldi horretan ezin izan dute diru-sarrerarik lortu zenbait kasutan, eta beste kasu batzuetan, oso urriak. "Hori guztia dela eta, Udalaren Ekonomia Sustatzeko Arloak uste du neurri ekonomikoak bultzatu behar direla Getxon dauden establezimenduei berriro ateak irekitzen laguntzeko, eta, horrela, Covid-19ak eragindako osasun-krisiaren aurretik zegoen enpresa-ehunari eusteko eta baita, ahal den neurrian, bere jarduerarekin sortutako enpleguari eusteko ere", adierazi du Amaia Aguirre alkateak.

Hau lehen neurria da. Bizkaiko Foru Aldundiagaz eta Eusko Jaurlaritzagaz lankidetzan, herritarrak normaltasuna berreskuratzen joateko behar diren jarduerak sustatzen eta osatzen jarraituko du Udalak.

Hartzaileak

Ezohiko laguntzen deialdi hau Getxon publikoarentzat zabalik dagoen establezimendu  batean jarduera ekonomikoa garatzen duten pertsona fisiko eta juridikoentzat da. "Horiek eskuratu ahal izateko, berriz irekitzen direnetik gutxienez lau hilabetez zabalik izateko konpromisoa hartu beharko dute, eta martxoaren 14ko 463/2020 Dekretuaren itxierak eta haren ondorengo aldaketek eragina eduki behar izan dute, eta ez bada behartuta egon hura ixtera, apirilean fakturazioa % 75 murriztu dela justifikatu beharko du, 2019ko hileko batez bestekoarekin alderatuta", azaldu du Iñigo Urkitza Ekonomia Sustatzeko zinegotziak.

Eman beharreko gehieneko zenbatekoak

Eman beharreko gehieneko zenbatekoak honako hauek izango dira:

  • 1.500 euro Getxon jendearentzako arreta duen lokal bat duen pertsona edo erakunde bakoitzarentzat. Era berean, honako zenbateko hauek gehituko zaizkie Getxon lokala duten pertsonentzat edo erakundeentzat, baldin eta langileak badituzte eta haietan lan egiten badute, beti ere  langileen kopuruari eusteko gutxieneko konpromiso bat hartzen badute:
    • 1 eta 3 langile artean (biak barne) mantentzeagatik: 300 euro.
    • 4-5 langile mantentzeagatik (biak barne): 600 euro.
    • 6 langiletik gora mantentzeagatik (hori barne): 900 euro.

Beste baldintza batzuk

Diru-laguntza norgehiagoka-araubidean emango da, hau da, ez da aurkezten den ordenan emango, zenbatekoak jasotako eskabide guztien artean banatuko dira, betiere ezarritako baldintzak betetzen badituzte eta guztientzat aukera-berdintasuna bermatzen badute.

Onartutako eskabideen kopuruak ezarritako gehieneko aurrekontu-kreditua gainditzen badu, laguntza guztiak proportzionalki murriztuko dira.

Eskabideak egoitza elektronikoaren bidez egingo dira (www.getxo.eus), eta eskabideak aurkezteko epea 15 egun naturalekoa izango da BBOn argitaratzen denetik  eta ebazpena gehienez 3 hilabeteko epean izango da. Alarma-egoeran zirkulazioa mugatuta dagoenez, prozedura telematikoki izapidetzea gomendatzen da.

Laguntza hauek beste administrazio batzuek autonomoentzat, profesionalentzat eta enpresentzat kontzeptu eta helburu desberdinakaz deitutako laguntzen osagarri dira.

Erlazionatuak

Getxoko merkataritzako eta ostalaritzarako laguntza bereziak eskatu ditu PPk

Getxo

Getxoko PPko bozeroaleak, Eduardo Andradek, udal-gobernua kritikatu du merkataritzaren eta ostalaritzaren egoerari behar bezala ez erantzutearren. ...
Koronabirusaren krisiari aurre egiteko hainbat proposamen mahaigaineratu ditu Plentziako EH Bilduk

Plentzia

Aditu askoren arabera, koronabirusak krisi ekonomiko eta osasun arazo larriak eragingo ditu datozen hilabeteetan. Egoera horri aurre egin guran, Pl...

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun