San Isidro (irailaren bigarren asteburura atzeratuak), Zubilleta, San Juan (Andra Mari), Santa Ana, San Inazio, Itzubaltzeta/Romo eta Portu Zaharreko jaiak ez dira ospatuko, ezta Nazioarteko Paella Lehiaketa ere. Uztailean zehar berriro ere aztertuko da egoera, Mesedeetako eta San Martin jaiak osasun-berme guztiakaz antolatzea posible den erabakitzeko. Hala jakinarazi du Udalak ohar bidez.
Zenbait jai-batzordek herritarrak animatu eta gizarte-egitura suspertzeko eskaerari erantzunez, Udalak aurtengo jaiak antolatzeko diru-laguntzaren aurrekontuaren % 15 emango die iraila bitarteko batzordeei ekitaldi programa bat gauzatzeko, higiene- eta osasun- bermeak mantenduta. Programa horrek honako ekitaldi hauek hartuko ditu: streaming bitartez eskainitako ikuskizunak, online lehiaketak, merchandisingaren diseinu eta ekoizpena eta sare sozialen bitartez jaiak gizarteratzeko bideo baten grabaketa. Gainerako aurrekontua bertoko kultura sektorea sustatzeari zuzendua egongo dela azpimarratu du Udalak.
