San Nikolas Ikastolak, euskal kultura eta euskararekiko duen konpromiso sendoa bermatzen jarraitzeko helburuagaz, Ibilaldiaren edizio bat antolatzeko plana aurkeztu zuen joan den ikasturtean. Ikastolen Elkarteko eta Bizkaiko Ikastoletako ordezkariek, jaso zituzten hautagaitzak aztertu ondoren, pasadan urtarrilean Ibilaldiaren 46. edizioa San Nikolas Ikastolari esleitu zioten.
Ikastetxeko arduradunek jakinarazi dutenez, 2024an izango den edizioaren bitartez, San Nikolas ikastolak zenbait helburu lortu gura ditu, hala nola "Ibilaldia kostaldeko lurralde erakargarri honen bidez bultzatzea". Diotenez, Getxo ondo komunikatuta dagoen herrialdea da, oso ezaguna eta jende multzo handiak biltzeko eremu zabalak dituena. Hala, jaialdiaren ibilbidea eta bere guneak oraindino moldagarriak badira ere, 2002an izan zuen arrakasta kontutan hartuta, datorren ediziorako guneak honako hauek izan daitezkeela aurreikusi dute: San Nikolas ikastola bera, Algorta erdiguneko Telletxe plaza, Ereagako hondartza, Portu Zaharra, Arrigunagako hondartza, Getxoko Andra Mari eta San Nikolas enparantza.
San Nikolas ikastolak aurkeztutako proiektuan adin guztietako pertsonentzako ekintzak daude barneratuta: "Ikastolak euskal kultura bultzatzeko duen nahiarekin bat eginez, txistulariak, bertsolaritza ikuskizunak, euskal musika-taldeen kontzertuak, kirol tradizionalen erakusketak… izango ditugu bertan".
