Elkarrizketak

Naiomi Matthews borrokalari getxoztarra, Espainiako txapelduna

© NAIOMI MATTHEWS

Valentziako La Nucían jokatutako grappling-txapelketako txapelduna izan da Naiomi Matthews borrokalari getxoztarra, 53 kiloko kategorian. Apirilaren 10 eta 11n izan zen lehia, grappling eta grappling gi modalitatekoa; datorren astean, aldiz, Europako txapelketan arituko da, Varsovian (Polonian). Txapelketa bien arteko deskantsuaz baliatuta, horretaz guztiaz berba egin dugu kirolariagaz.

Espainiako grappling txapelketa irabazi duzu. Zelan joan da lehia?

Aurtengo maila oso altu dago; gero eta lehiakide gehiago daude, baita prestatuagoak ere. Dena dela, oso ondo sentitu naiz; ondo entrenatzen ibili naiz azkenaldian, eta hori nabaritu egin da tatami gainean.

COVID-19aren izurritearen eraginez, zelakoak izan dira zure entrenamenduak? Egokitu behar izan duzu zerbait?

Azarora arte gogorra izan zen. Izan ere, bakarrik entrenatu behar nuen, baina, gero, apurka-apurka, betiko eredura bueltatzeko aukera izan dugu, gutxi gora behera. Hala ere, ordutegiak moldatu behar izan ditut klaseko eta laneko ordutegiak aldatu egin direlako, etxeratze-aginduaren ondorioz.

Zelan hartu duzu garaipena?

Oso pozik nago. Eguneroko lanak saria lortu du, eta, beraz, horrek esan nahi du gimnasioan lan ona egiten ari garela.

Aurrera begira zeintzuk helburu jarri dizkiozu zure buruari?

Datorren astean, apirilaren 26an eta 27an, Europako Txapelketan parte hartuko dut, Polonian, eta espero dut emaitza onak lortzea bertan ere. Gustatuko litzaidake, behintzat, joan den urteko emaitzak errepikatzea, baina ziur nago gogorra izango dela, beste herrialde batzuetan normal entrenatzen segitu dutelako denbora tarte honetan.

Grappling, jiu jitsu brasildarra, borroka olinpikoa... zein modalitatetan sentitzen zara erosoen?

Grappling eta jiu jitsu oso bertsuak dira; arauak aldatzen dira horietan, eta, ondorioz, baita estrategia ere. Baina, dudarik gabe, jiu jitsu brasildarra aukeratuko nuke nik.

Zergatik? Zer nabarmenduko zenuke modalitate bakoitzetik?

Jiu jitsuan askeago sentitzen naiz; joko bat da niretzat, eta, egunero, ikusten eta ikasten ditudan teknika berriek beti harritzen naute. Grappling egiterakoan, aldiz, lana leherkariagoa eta arinagoa da, eta, borroka olinpikoan erresistentzia handiagoa beharrezkoa da.

Erlazionatuak

"Kideekin entrenatzeko aukera izan beharko genuke guk ere"

Getxo

Borrokalari peto-petoa da Naiomi Matthews Martín getxoztarra. Grappling, jiu-jitsu brasildarra zein borroka olinpikoan aritutakoa da, baita ...

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun