Astebete igaro da Algortako bost lagunek udalerrian bost egunez euskaraz bizitzeko erronkari heldu ziotenetik. Maiatzaren 31n hasi eta ekainaren 4ra bitartean, bostek euren egunerokoan euskaraz soilik aritzeko konpromisoa hartu zuten, Algortan euskaraz bizitzeko topatzen dituzten aukerak eta oztopoak identifikatzeko xedez. Algor7arrak Bat kanpainaren barruko ekimena izan da hori, eta bultzatzaileek ondorioztatu dutenez, ariketa "positiboa izan da".
Arduradunek azaldu dutenez, bost eguneko dinamika horrek ondorio "argiak" utzi ditu euskararen erabilerari dagokionean. Kide guztiek euren eguneroko kroniketan aipatu duten bezala, euskara herriaren ardatza izatea nahi bada, hiztunon konpromisoa irmoa izan behar da. "Gehiagotan, pertsona gehiagorekin eta toki gehiagotan aritu behar gara euskaraz, horrek jada existitzen diren arnasguneak finkatu eta berriak irekitzeko aukera ematen digulako; hala nola gure eguneroko 'euskarazko' harreman-zirkuituak, dendari euskaldunak, hezkuntza zentroak, familia, lagun-taldea...".
Kontrara, aldiz, euskararen normalizazioa oztopatu eta egunerokotasunean euskaraz aritzeko mugak identifikatu ahal izan dituzte ekimen horren bitartez. "Euskalduna ez den administrazioa, euskaraz hitz egiten ez dakiten langile eta dendariak –batzuetan erantzun txarrekin, gainera–, gure ingurune hurbiletan ematen diren erdarazko joerak... Horiek ere badira gurean, eta gure hizkuntzaren biziraupena arriskuan jartzen dute", deitoratu dute bultzatzaileek.
Hori guztia dela eta, ariketa horregaz euskararen aldeko lanketak duen garrantzia atzeman dute dinamikako kideek. Ondorioztatu dute euskara ez dela normalizatuta dagoen hizkuntza, "inondik inora". Hala, egoera horri buelta ematea ezinbestekoa dela aldarrikatu dute, eta, horretarako, hiztunon bultzada zein administrazio eta erakundeen konpromisoa eta eragina funtsezkoa dela azpimarratu dute. "Hizkuntza, azken finean, eskubide kontua ere bada, baina ez hori bakarrik; euskara gure nazioaren ardatza da, euskal herritarrak egiten gaituena. Zaindu eta borrokatu dezagun, beraz!".